Salmos 68 - Chuya Qellqa 1992

Israelpa vencesqanmanta

Davidpa takisqan

¹ Dios hatariptinqa enemigonkunam cheqerunku; cheqniqninkunam qayllanmanta ayqerunku.

² Wayrapa apasqan qosni hinam chinkarunku, ninapa chulluchisqan cera hinam chullurunku; mana allin runakunaqa Diospa qayllanpim chinkarunku.

³ Allin ruwaqkunam ichaqa kusikunqaku, Diospa qayllanpim kusikunqaku, kusikuymantam pawaykachanqaku.

⁴ Diosman takipuychik, hatun sutinmanta yupaychaychik, puyukunapi puriqta hatunchaychik. Paypa sutinqa Tayta Diosmi, paypa qayllanpi kusikuychik.

⁵ Diosqa chuya wasinpim yachakun, mana tayta-mamayuqkunapa taytanmi, viudakunatapas nanachikuqmi.

⁶ Diosqa mana piniyuqkunamanmi aylluta qon, presochasqakunatam hurqospa chaninchan, mana kasukuqkunam ichaqa chaki allpapi yachanqaku.

⁷ Diosnilláy, llaqtaykipa ñawpaqninta riptikim, chunniqninta puriptikim,

⁸ kay pachapas katkatatarqa, cielokunamantam parapas chayamurqa. Israelpa yupaychasqan Diospa ñawpaqninpim Sinaí orqopas katkatatarqa.

⁹ Dios Taytalláy, sinchillatañam parachimurqanki, chakisqa allpaykitam nuyuykachirqanki,

¹⁰ llaqtaykitam yachananpaq chaypi churarqanki. Diosnilláy, kuyapayakuynikiwanmi wakchakunata yanapaykurqanki.

¹¹ Tayta Diosmi rimarirqa, chay allin rimariytaqa achkallaña warmikunam willakurqaku:

¹² “Llapa reykunam tropankunapiwan ayqechkanku”, nispanku. Enemigonkumanta tukuy ima qechumusqankutam warmikuna wasinkupi rakinakuchkanku.

¹³ Palomapa raprankunatam qollqewan llusisqata rakinakuchkanku, qoriwan llusisqa purankunatam rakinakuchkanku. Qanmi ichaqa ovejakunapa kanchanpi puñuspa qeparurqanki.

¹⁴ Tukuy Atiyniyuq Tayta Diosmi rikuriykamuspan llapa reykunata cheqerachirqa, Salmón orqoman ritichichkaq hinam cheqerachirqa.

¹⁵ Basanpi orqokunaqa hatu-hatunmi, puntankunapas hatu-hatunmi.

¹⁶ Yaw, hatu-hatun orqokuna, ¿Imanasqataq Diospa yachay munasqan orqota envidiakuspa qawankichik? Tayta Diosqa cheqaptapunim chaypi wiñaypaq yachakunqa.

¹⁷ Diospa guerrapaq carretankunaqa waranqantin-waranqantinmi. Señorqa Sinaí orqomantam santuarionman hamurqa.

¹⁸ Dios Taytalláy, presokunata aparikuspam wichayta qespirqanki, runakunamantam impuestota chaskirqanki, mana kasukuqkunapas qayllaykipim uchuychakurqaku.

¹⁹ Dios Tayta hatunchasqa kachun; Salvaqninchik Diosmi sapa punchaw chaninpi bendeciykuwanchik.

²⁰ Tayta Diosllam salvaqninchikqa, Dios Taytallam wañuymanta hurqoqninchikqa.

²¹ Tayta Diosmi enemigonkunapa umanta pakiparunqa, huchapi puriqkunapa umantam chitqaparunqa.

²² Tayta Diosmi kaynata nin: Basán lawmantam kutichimusqayki lamar qochapa ukunmantam kutichimusqayki.

²³ Enemigoykikunapa yawarninpi chakikita mayllakunaykipaq, allqoykikunamanpas chayta laplachinaykipaq, nispa.

²⁴ Diosnilláy, runaykikunatam suyullaña riqta rikuchkanku, Reynilláy, Diosnilláy, llapallankum chuya wasikiman richkanku.

²⁵ Takiqkunam ñawpaqta richkanku, tocaqkunañataqmi qepanta, chawpitañataqmi sipaskuna panderetata tocastin richkanku.

²⁶ Tayta Diosta huñunakuspa qapaqchaychik, Israelpa mirayninkuna Tayta Diosta yupaychaychik.

²⁷ Ñawpaqninkutam sullkanku Benjamín richkan, Judapa, Zabulonpa, Neftaliypa achkallaña kamachiqninkunapiwan.

²⁸ Diosnilláy, atiynikita qawachikuy, yanapawasqaykiku kallpaykita qawachiwayku.

²⁹ Jerusalenpi temploykiraykum, llapa reykuna regalokunata apamusunki.

³⁰ Egiptota qaqchay, totorakunapa ukunpi manchapa animalta qaqchay, piñasqa malta torokunatawan qaqchay, paykunaqa apuyayta maskaspankum llaqtakunata cheqechinku, guerralla kuyaq runakunata cheqechiy.

³¹ Egiptomantam hatun kamachikuqkuna hamunqaku; Etiopía runakunapas Diosmanmi makinkuta hoqarinqaku.

³² Kay pachapi nacionkuna, Diosman takiychik; takikunata Señorman takiychik.

³³ Ñawpaq tiempomantaraq kaq cielokunapa hawanpi puriqman takiychik, hatunmanta qaparispa rimasqanta uyariychik.

³⁴ Diosqa atiyniyuq kasqanta reqsiychik, payqa Israelpa hawanpim munaychakun, atiyninqa hanaq pachakamaraqmi chayan.

³⁵ Diosnilláy, ¡mayna admirakuypaqmi santuarioykipi kanki! Israelpa Diosninmi atiytapas kallpatapas llaqtanman qon. ¡Dios Taytayá qapaqchasqa kachun!