Salmos 67 - Chuya Qellqa 1992

Nacionkuna Diosta yupaychanankumanta

Cuerdayuq tocanakunawan takinapaq

¹ Dios Taytallayku llakipayarispa bendeciykullawayku, allin ñawikiwan qawariykullawayku, kuyakuynikita reqsiykachillawayku;

² kay pachapi nacionkuna, ñannikitawan salvacionnikita reqsinankupaq.

³ Dios Taytallayku, llaqtakunayá yupaychasunki, runakunayá hatunchasunki.

⁴ Llapa nacionkuna kusikuchunku, mana piman sayapakuspa runakunata juzgasqaykirayku, kay pachapi lliw nacionkunata allinta michisqaykirayku.

⁵ Dios Taytalláy, llaqtakunayá yupaychasunki, runakunayá hatunchasunki.

⁶ Chakrakunam sinchita rurunqa, ¡Diosninchikqa bendeciwasunmi!

⁷ Diosyá bendeciwasun, kay pachapi yachaqkuna payta kasukuychik.