Salmos 65 - Chuya Qellqa 1992

Diosllata yupaychanamanta

Davidpa takin

¹ Sión llaqtapi kaq Diosnilláy, qamllam yupaychasqaqa kanayki, qanman prometekusqaykutaqa cumplinaykupunim.

² Mañakusqaykutam qamqa uyarinki, llapallan runakunam qanman asuykamusunki.

³ Mana allin ruwasqaykum munaychakuruwanku, ichaqa qanmi pampachaykullawankiku.

⁴ ¡Mayna kusisqam temploykipa pationpi yachananpaq akllasqayki runaqa! Wasikipi allin kaqkunawanmi, temploykipi allin kaqkunawanmi, ñoqaykuqa saksaykusaqku.

⁵ Salvaqniyku Dios Taytallayku, allin ruwasqaykiman hinam contestaykuwankiku. Kay pachapi runakunapas, lamar qochapi kaqkunapas, qamllapim hapipakunku.

⁶ Qanmi atiynikiwan orqokunata sapinchanki, kallpaykiwanmi orqokunata takyachinki;

⁷ lamar qochapa qapariynintam, olankunapa pulchiqyasqantam, runakunapa chaqwakusqantam upallachinki.

⁸ Admirakuypaq kaqkuna ruwasqaykiwanmi kay pachapa muyuriqninpi yachaqkuna mancharikunku; intipa qespimunanmanta intipa seqaykunankamam kusikuymanta qaparinku.

⁹ Kay pachatam nanachikunki, paraykita chayachimuspam sinchillataña ruruchinki. Yarqakunata yakuwan huntachispam trigokunata wiñachinki, ¡Chaynatam chakrata ruruchinki!

¹⁰ Chakrapa surconkunatam yakuwan nuyuykachinki, surconkunatam yakuta kallpachinki, paraykiwan allinta nuyuykachispam chakrata chaninpi ruruchinki.

¹¹ Qamllam kawsaykunapa allin qespinan watata ruwarunki, puyuykikunawanmi allinta parachimunki.

¹² Purunpi pastokunapas llanllay-llanllaymi kachkanku, moqokunapas fiestapaq pachasqa hinam kachkanku.

¹³ Pampakunapas animalkunawanmi huntarinku, qechwakunapas kawsaykunapa huntarisqanmi kachkanku. ¡Llapallankum kusikuymanta qaparispa takichkanku!