Biblia Todo Logo
Bìoball air-loidhne

- Sanasan -

Salmos 64 - Chuya Qellqa 1992


Waqaychananpaq Diosta mañakusqanmanta
Davidpa takin

1 Diosnilláy, sasachakuyniykuna willakusqayta uyariykullaway; enemigoykunamanta waqaychaykullaway.

2 Mana allin ruwaqkunapa tanteanakusqanmanta pakaykullaway, chaqwa ruwaqkunamanta pakaykullaway.

3 Qallunkupas ñawchiyachisqa espada hinam, flechachkaq hinam qatqe rimaykunata rimanku.

4 Pakakusqankumantam mana huchayuq runata flechanku, mana manchakuspam qonqaymanta flecharunku.

5 Mana allinkunata ruwanankupaqmi kallpanchanakunku, trampakunata pakasqallapi churanankupaqmi rimanakunku. “Manam pipas rikuwanchikchu” nisparaqmi ninkupas.

6 Mana allinkunata yuyaymanaspan ninku: “Allinsutam tantearunchik, manam pipas musyawasunchu”, nispanku. Runakunaqa sakrillaña sonqoyuqmi.

7 Tayta Diosmi ichaqa qonqaymanta paykunata flecharunqa.

8 Rimasqallankum paykunataqa wichirachinqa, pipas chayta rikuqñataqmi asipayanqa.

9 Hinaptinmi Tayta Diosta llapallan runakuna manchakunqaku; Diospa hatu-hatun ruwasqankunamantam willakunqaku ruwasqankunapim yuyaymananqaku.

10 Allin ruwaq runaqa Tayta Diospim kusikunqa, payllapim hapipakunqa; ¡Allin sonqoyuqkunaqa Tayta Diostam yupaychanqaku!

Chuya Qellqa Revisión @ Sociedad Bíblica Peruana, 2012

Peruvian Bible Society
Lean sinn:



Sanasan