Salmos 61 - Chuya Qellqa 1992

Diospa waqaychakuyninpi hapipakusqanmanta

Davidpa takin

¹ Dios Taytalláy, qayakamullasqayta uyariykullaway, mañakamullasqayta chaskiykullaway.

² Sonqollay wañunayaptinmi kay pachapa patanmanta qayakamullayki. Hatun qaqapa hawanman churaykullaway.

³ Qamllam waqaychaqniyqa kanki, enemigomanta pakakuna torrem kanki.

⁴ Ñoqallayqa wasikipim wiñaypaq kawsakuyta munallani, rapraykipa ukunpi pakakuytam munallani.

⁵ Qam Diosnillaymi, prometekusqaykunata uyariykuwarqanki, sutiki manchakuqkunapa herenciantam qoykuwarqanki.

⁶ Munaychakunaypaqyá wataykunata yapaykuway, unay watakunatayá kawsachikuway.

⁷ Dios Taytalláy, qampa yanapakuyllaykiwanyá munaychakusaq, kuyakuynikiwan cheqap kaynikiyá waqaychawachun.

⁸ Chaynapim sutillaykimanta wiñaypaq takillasaq, sapa punchawmi nisqaykunata ruwallasaq.