Salmos 60 - Chuya Qellqa 1992

Diospa yanapakuyninta mañakusqanmanta

Aram-naharaimpa chaynataq Aram-sobapa contranpi peleaq lloqsiptin, Joab kutimuspan Kachi qechwapi chunka iskayniyuq waranqa Edom castakunata wañurachiptin, runakunaman yachachinanpaq Davidpa takisqan.

¹ Dios Taytalláy, piñakuynikipim saqeruwarqankiku qayllaykimantam wischuruwarqankiku, ¡kallpallaykutayá kutirichimullawayku!

² Kay pachatam kuyuchispa raqraparachinki, ama tuñirunanpaq raqrankunata wichqaykuy.

³ Runaykikunatam ñakarichiwarqankiku, piñakuynikiwanmi sinkarachiwarqankiku.

⁴ Haykam hapipakuqnikimanmi ichaqa señalta qorqanki flechaqkunapa ñawpaqninmanta ayqekunankupaq.

⁵ ¡Uyariykullawayku! Kuyasqaykikunata libraykullawayku, atiynikiwan salvaykullawayku.

⁶ Chuya wasinpim Tayta Dios nirqa: ¡Mayna kusikuywanmi Siquem llaqtatawan Sucot qechwapi allpakunata rakinasaq!

⁷ Manasespawan Galaadpa allpankunaqa ñoqapam; Efrainpas umay harkachikunaymi, Judañataqmi kamachikunay vara.

⁸ Moabqa mayllakunay lavatorioymi, Edompas usutayta wischunaymi, Filisteañataqmi venceruspa kusikunay.

⁹ ¿Pitaq murallasqa llaqtakama pusawanqa? ¿Pitaq Edom nacionkama pusawanqa?

¹⁰ ¿Manachu qam Diosnillayku? Dios Taytallayku, qanmi ichaqa wischuruwarqankiku, manañam tropaykuwanpas lloqsinkiñachu.

¹¹ Enemigokunamanta pakaykuwayku, runakunapa yanapakuyninqa yanqapaqmi.

¹² Diospa yanapakuyninwanqa hatun kaqkunatam ruwasun, paymi enemigonchikunata sarupanqa.