Salmos 6 - Chuya Qellqa 1992

Sasachakuy punchawpi Davidpa mañakusqanmanta

Kay takiqa pusaq cuerdayuq instrumentokunawan takinam

¹ Dios Taytalláy, piñakuynikipiqa amayá qaqchallawaychu, rabiakuynikipiqa amayá castigawaychu.

² Dios Taytalláy, llakipayariykullaway, pasaypaq mana kallpayuq onqosqam kachkani. Dios Taytalláy, hampiykullaway, llapa tulluykunam katkatatan mana sayariy atiqñam tarikuni.

³ Dios Taytalláy, manchakuymantam katkatatachkani, ¿haykapiñataq yanapaykullawanki?

⁴ Dios Taytalláy, kutiriykamuspa libraykullaway, kuyakuynikiman hina salvaykullaway.

⁵ Wañuruspaqa manañam pipas yuyasunkiñachu, wañusqakunapa kasqanpiqa manañam pipas yupaychasunkiñachu.

⁶ Ñoqallayqa waqaytapas amiruniñam, tutankuna waqasqaypim sawnaytapas weqeywan nuyurachiniña.

⁷ Llumpayta waqasqayraykum ñawillaypas antayarunña, enemigoykunapa causanpim antallataña qawakuchkani.

⁸ Ñoqamanta anchuychik mana allin ruwaqkuna, Tayta Diosmi waqallasqayta uyariykun.

⁹ Tayta Diosmi ruegakusqayta uyariykullawan, Tayta Diosmi mañakuyniyta chaskiykullawan.

¹⁰ Enemigoykunam mancharikuspa penqaypi kanqaku, penqakuymantam qonqayta ayqenqaku.