Salmos 59 - Chuya Qellqa 1992

Librasqa kananpaq Diosta mañakusqanmanta

Davidpa takisqan

¹ Diosnilláy, enemigoykunamanta libraykullaway, contraypi hatariqkunamanta salvaykullaway.

² Mana allin ruwaqkunamanta libraykullaway, wañuchiqkunamanta salvaykullaway.

³ Paykunaqa wañurachiwananpaqmi wateqawachkanku, kallpasapa runakunam contraypi huñunakurunku. Dios Taytalláy, manam huchallikuq kasqayraykuchu, nitaqmi mana allinta ruwasqayraykuchu.

⁴ Mana imamantam maqawanankupaq kallpamunku. ¡Yanapawanaykipaq rikchariy, yanapaykuwanaykipaq taripaykamullaway!

⁵ Tukuy Atiyniyuq Dios Taytalláy, Israelpa Diosnin, llapallan nacionkunata castiganaykipaq rikchariy, chay iskay uya runakunataqa ama llakipayaychu.

⁶ Tutanmi allqo hina anyakustin kutimunku hinaspam llaqtata muyurimunku.

⁷ Posoqotaraqmi atqonkupas, rimayninkupas espada hinaraqmi, chaymi ninku: “¿Pitaq uyariwasunchik?” nispanku.

⁸ Dios Taytalláy, qanmi ichaqa paykunamanta asikunki, llapallan nacionkunamantam burlakunki.

⁹ Dios Taytalláy, qamllamanmi hapipakamuyki, qanmi kallpanchaqniyqa kanki, qamllam waqaychaqniyqa kanki.

¹⁰ Kuyawaqniy Diosmi taripaykamuwanqa, enemigoykuna vencesqa kasqantam qawachiwanqa.

¹¹ Dios Taytallayku, nanachikuwaqniykum kanki, atiynikiwan paykunata cheqechiy, paykunataqa pampaman wikaparuy, ichaqa amayá chayllaqa wañurachiychu, chaynapi llaqtay ama qonqananpaq.

¹² Siminkuwan huchallikusqankumanta, llullakuspa piñakuywan rimasqankumanta, pay tukuq kasqankupa presochasqan kachunku.

¹³ Piñakuynikiwan paykunata tukuparuy, pasaypaq chinkachunku; chaynapim kay pachapi yachanqaku Diosqa Jacobpa reynin kasqanta.

¹⁴ Tutan kutimuspam allqo hina anyakustin llaqtata muyurimunku.

¹⁵ Mikuyta maskaspam kayman chayman kallpakachanku, mana saksaspankuñataqmi allwanku.

¹⁶ Ñoqam ichaqa atiynikimanta takillasaq, achikyaruptinmi qampa kuyakuynikimanta takisaq, qamqa harkaykuwaqniymi kanki, sasachakuy punchawkunapim waqaychaykuwanki.

¹⁷ Kallpanchaqniy Diosnilláy, qampaqmi takillasaq, qamllam waqaychaqniyqa kanki, qamllam kuyapayaqniyqa kanki.