Salmos 57 - Chuya Qellqa 1992

Ñakarichiqninkunamanta librananpaq mañakusqanmanta

Saulpa qayllanmanta machayman lluptikuspan Davidpa takisqan

¹ Diosnilláy, llakipayaykuwaspa kuyapayariykullaway, qamllamanmi hapipakamullayki, sasachakuykunamanta raprallaykipa ukunpi pakaykullaway.

² Tukuy imapa hawanpi munaychakuq Diostam qayakullasaq, yanapaykuwaqniy Diostam qayakullasaq.

³ Paymi hanaq pachamanta kuyakuynintawan cheqap kayninta kacharimunqa, piñakuywan qatikachawaqniy enemigoykunamantam salvaykuwanqa.

⁴ Runa mikuq leonkunapa chawpinpim kachkani, animal hina runakunam muyuriruwanku, kirunkupas lanzakuna flechakuna hinam, qallunkupas ñawchi espada hinam.

⁵ Diosnilláy, hanaq pachapa hawanpim kachkanki atiynikipas kay pachatam huntaykun.

⁶ Enemigoykunam wichiykachiwanankupaq toqllata churarunku, almallaymi hukmanyasqa kachkan, ñawpaqniypim uchkuta ruwarunku, ichaqa kikinkum chayman wichiykunku.

⁷ Diosnilláy, sonqollaypas chayllam kachkan takinaypaq, Diosnilláy, sonqollayqa chayllam kachkan yupaychanaypaq.

⁸ Almalláy, ¡rikchariy! Salterio hatariy, arpa waqaykuy, ¡Pacha achikyaytam hatarisaq!

⁹ Dios Taytalláy, llaqtakunapa chawpinpim yupaychasqayki, nacionkunapa ukunpim takipusqayki.

¹⁰ Kuyakuynikiqa hanaq pachaman haypaqraqmi, cheqap kaynikiqa puyukunaman haypaqraqmi.

¹¹ Diosnilláy, hanaq pachapa hawanpim kachkanki, kay pachatam atiynikiwan huntaykunki.