Salmos 56 - Chuya Qellqa 1992

Diosllaman hapipakunamanta

Filisteokuna Gat llaqtapi hapiruptinku Davidpa takisqan

¹ Diosnilláy, llakipayariykullaway, runakunam qatikachawachkanku, sapa punchawmi ñakarichiwanku.

² Sapa punchawmi enemigoykuna qatikachawanku; achkallañam hatun tukuspa contraypi hatarinku.

³ Manchakuypi tarikuspayqa qamllapim hapipakullani.

⁴ Diosllaman hapipakuspaymi palabranta hatunchani, Diosllapim hapipakuni manam manchakunichu. Wañuruqlla runaqa ¿imanawanqataq?

⁵ Paykunaqa sapa punchawmi imam rimasqayta qewiykunku, mana allin ruwawayllapim yuyaymanachkanku.

⁶ Huñunakuspam pakan-pakan wateqawachkanku, imam ruwasqaytam qawawachkanku, imaynapas wañurachiwaytam maskawachkanku.

⁷ Diosnilláy, huchankuman hina pagaykapuy, piñakuynikiwan llaqtakunata tuñichiy.

⁸ Qanmi kayman chayman lluptisqayta yuparqanki, weqeykunatapas puyñuykimanmi huñurqanki. ¿Manachum chaykunaqa libroykipi qellqasqa kachkan?

⁹ Qamta mañakuptiymi enemigoykunata qepaman kutirichinki; yachanipunim qam Diosniyqa ñoqaman sayapakuwasqaykita.

¹⁰ Diosllapim hapipakuni, palabrantam hatunchani; Diosllapim hapipakuni, rimaynintam yupaychani.

¹¹ Diosllapim hapipakuni, manam manchakusaqchu. Wañuruqlla runaqa ¿imanawanqataq?

¹² Diosnilláy, imam nisqaykunataqa ruwasaqpunim, hatun reqsikuywanmi yupaychamusqayki.

¹³ Wañuymantam hurqoykuwarqanki, urmanaymantam harkaykuwarqanki, qampa ñawpaqnikipi purinaypaq, kawsay achkiynikipi purinaypaq.