Salmos 55 - Chuya Qellqa 1992

Ñakariyninpi mañakusqanmanta

Davidpa takisqan

¹ Dios Taytalláy, mañakusqayta uyariykullaway, qayakamullaptiy amapuni pakakuychu.

² Uyariykullawaspa contestaykullaway, sasachakuyniypim qayakamullayki,

³ Enemigoykunapa qaparisqanmi, mana allin runakuna ñakarichiwasqanmi, katkatatachiwachkan; hatun sasachakuytam churkuruwanku, paykunaqa piñakuspam qatikachawanku.

⁴ Sonqollaymi nanay-nanay kachkan, wañuy manchakuymi inturullawan.

⁵ Manchakuymi yaykurullawan, manchakuymantam katkatatachkani.

⁶ Chaymi nirqani: “Amalaya paloma hina raprayuq rikuriruyman, pawarikuspaycha samayta tariyman;

⁷ karumancha lluptikuyman, chunniqpichá yachakuyman.

⁸ Sinchi wayramantachá ayqekuyman, wayra-paramantachá lluptikuyman”, nispay.

⁹ Señorlláy, paykunata tuñichiy, rimayninkuta pantachiy. Llaqtapiqa cheqninakuyllatam rikuni, llumpay piñanakuyllatam qawani.

¹⁰ Tuta punchawmi llaqtata muyuchkanku, millakuypaq hucha ruwayllam munaychakuchkan,

¹¹ callenkunapipas wañuchinakuywan pantachinakuyllam kachkan.

¹² Sichum huk enemigo kamiwaptinqa, manachá imaniymanchu karqa; sichum cheqniwaqniy contraypi hatariptinqa, paymantaqa pakakuymancha karqa.

¹³ Aswanqa qamraqmi puriqmasiy kachkaspayki, llumpay kuyanakuqmasiy kachkaspayki, contraypi hatarirunki.

¹⁴ Qanwanqa kuskam puriq kanchik, vidanchikmantapas willanakuqmi kanchik, Diospa wasinmanpas kuskam riq kanchik.

¹⁵ Enemigoykuna qonqayta wañuruchunku, kawsachkaqllataraqpas pampachunku. Paykunapiqa mana allinkunallam munaychakuchkan.

¹⁶ Ñoqam ichaqa Tayta Diosta qayakullasaq, Tayta Diosmi ñoqataqa salvaykuwanqa.

¹⁷ Achikyaqta, chawpi punchawta hinaspa tutaykuytam Tayta Diosta mañakullasaq, qayakuptiymi uyariykullawanqa.

¹⁸ Contraypi hatariq guerramantam, nana-nanaq enemigoykunamantam, hawkalla kanaypaq librawanqa.

¹⁹ Wiñaypaq munaychakuq Diosmi uyariykullawaspan ñakarichinqa, paykunaqa huchallapim kawsachkanku, Diostapas manam manchakunkuchu.

²⁰ Paykunaqa kuyanakuqmasinmanpas maqananpaqmi kutiriykunku, hawkalla kanankupaq contrato ruwasqankutapas manam ruwayman churankuchu.

²¹ Rimasqankupas mantequilla hina llampuy-llampuymi, sonqonkupim ichaqa wañuchiyllata tanteachkanku; rimayninkupas aceite hina llampuy-llampuymi, ichaqa ñawchi cuchillomanmi rikchakun.

²² Tayta Diosman sasachakuynikikunata saqeykuy, paymi yanapasunki; allin ruwaq runataqa manam wichisqataqa saqenqachu.

²³ Diosnilláy, runa wañuchiqkunawan llullakuqkunaqa manam unaytaqa kawsanqakuchu, paykunataqa chinkarunanpaqmi sepulturaman tanqaykunki. Ñoqam ichaqa qamllapi hapipakullani.