Salmos 53 - Chuya Qellqa 1992

Runaqa huchata kuyaq kasqanmanta

Davidpa takin

¹ Ruqru runam sonqonpi nin: “Diosqa manam kanchu”, nispa. Paykunaqa pasaypaqtam huchallikurunku, millakuypaq kaqkunatam ruwarunku, ¡allin ruwaqqa manam hukllapas kanñachu!

² Diosmi hanaq pachamanta runata qawamuchkan, allin yachayniyuq runata tariykunanpaq, pillatapas Tayta Dios maskaqta tariykunanpaq.

³ Ichaqa llapallankum Tayta Diosmanta karunchakurunku; ¡Manañam pipas allin ruwaqqa kanñachu! ¡Manañam hukllapas kanñachu!

⁴ Mana allin runakunaqa mana yachayniyuqmi rikurirunku, paykunam llaqtayta tantata hina mikurunku, Tayta Diostaqa manam qayakunkuchu.

⁵ Paykunaqa mana katkatatananku kachkaptinpas enemigonkunapa tullunkunata Tayta Dios wischusqanraykum manchakuymanta katkatatanqaku. Tayta Dios qepancharuptinmi penqaypi kanqaku.

⁶ ¡Ima allincha kanman Sionmanta Israelpa salvaqnin hamuptinqa! ¡Llaqtanpa kawsayninta allinpaq Tayta Dios tikraptinqa! Jacobpa mirayninkunam kusikunqaku, Israel nacionpi yachaqkunam kusikunqaku.