Salmos 49 - Chuya Qellqa 1992

Kawsakuytaqa qollqewan mana rantinamanta

Coreypa mirayninkunapa takin

¹ Llapallan llaqtakuna kayta uyariychik, kay pachapi llapallan nacionkuna uyariychik,

² humildekunawan munayniyuq runakuna, apukunawan wakcha runakunapas, uyariychik.

³ Ñoqaqa yachaywanmi rimasaq, allin yachachikuykunatam rimasaq.

⁴ Watuchikunatam nisqaykichik, sonqoypi pakasqa kaqkunatam arpawan willakusaq.

⁵ ¿Imanasqataq sasachakuy punchawkunata manchakusaq? ¿Imanasqataq enemigoykunapa mana allin ruwayninta manchakusaq?

⁶ Paykunaqa kapuqninkupim hapipakunku, apu kayninkumantam alabakunku;

⁷ ichaqa manam mayqanninkupas wawqenta qollqenwanqa libranmanchu, manataqmi salvakunanpaqqa Diosmanpas pagayta atinmanchu.

⁸ Runaqa maynaña qollqewanpas manam kawsakuytaqa rantiyta atinmanchu,

⁹ manam pipas wiñay kawsaqchu, mana wañurunanpaqqa.

¹⁰ Lliwpas wañuqllam kanchik; yachayniyuqpas mana yachayniyuqpas, wañuruptinkuqa qori-qollqenkupas hukpaqmi qepanqa.

¹¹ Allpankutaña sutinkuwan sutichaptinkupas, paykunapaqqa sepulturañam wiñaypaq wasinku kanqa. Chaymantaqa manañam haykapipas lloqsimunqakuchu.

¹² Runaqa mayna apu kaspapas manam wiñaypaqchu kawsanqa. Paykunapas animalkuna hina wañuruspa chinkaruqllam.

¹³ Chaynatam tukurunqaku kikillanpi hapipakuqkunaqa, chaynam tukurunqaku kikinkumanta alabakuqkunaqa.

¹⁴ Chayna runakunapaqqa wañuymi michiqninkupas, paykunataqa wañuymi sepulturaman qaykuchkan, paykunapaqqa kallpanku tukuruptinmi sepulturaña wasinku kanqa. Achikyaramuptinmi Diospa munasqanman hina kawsaqkuna paykunapi munaychakunqa.

¹⁵ Diosmi ichaqa wañuypa atiyninmanta librawanqa, ñoqallaytaqa maymi kasqanmanmi pusakuwanqa.

¹⁶ Amayá hukmanyaychu pipas apuyaspa tukuy imawan wasinta huntachiptinqa,

¹⁷ chay runaqa wañuspapas manam imantapas apanqachu, nitaqmi tukuy imankunapas sepulturamanqa qatinqachu.

¹⁸ Kawsachkaspallaraq kusikuspapas, apu kasqanrayku runakunapa alabasqanña kaspapas,

¹⁹ ñawpaq taytankuna hina wañuruspaqa, manañam achkitapas rikunqañachu.

²⁰ Runaqa mayna apuña kaspapas manam wiñaypaqchu kawsanqa, paykunaqa animalkuna hina wañuruspa chinkarunqallam.