Salmos 48 - Chuya Qellqa 1992

Jerusalén llaqta kuyayllapaq kasqanmanta

Coreypa mirayninkunapa takin

¹ Tayta Diosqa Tukuy Atiyniyuqmi, payllam yupaychana Diosqa, llaqtanpi payllata yupaychasun, akllakusqan orqopi payllata hatunchasun.

² Mayna kuyayllapaq norte lawpi Sión moqoqa, chay llaqtaqa kay pachapa kusikuyninmi, Tukuy Atiyniyuq Reypa llaqtanmi.

³ Diosqa palacionkunapim waqaychakuq kasqanta reqsichikun.

⁴ Llapa reykunam huñunakuruspanku chay llaqtapa contranpi rirqaku.

⁵ Ichaqa rikuykuspankum llumpayta admirakurqaku, pantaypi tarikuspankum manchakuymanta ayqerqaku.

⁶ Manchakuymi paykunata intuykurqa, wachakuq warmi hinam nanaywan qewipakurqaku.

⁷ Intipa qespimunan lawmanta sinchi wayrata hatarichimuspam Tarsis llaqtapa barconkunata pakiparqanki.

⁸ Uyarisqanchikman hinam, Tukuy Atiyniyuq Diospa llaqtanta rikuykunchik, ¡Diosmi chay llaqtataqa wiñaypaq takyachin!

⁹ Diosnilláy, Temployki ukupim hatun kuyakuynikimanta yuyariniku.

¹⁰ Diosnilláy, kay pachapa patankamam sutikiqa ancha reqsisqa, atiynikiwanmi allin kaqkunata ruwanki.

¹¹ Sión moqopi yachaqkunayá anchallataña kusikuchunku, Judapi yachaqkunapas allin arreglokuna ruwasqaykimantayá kusikuchunku.

¹² Sión llaqtata muyumuspa torrenkunata yupamuychik.

¹³ Muyuriq perqankunata sumaqta qawamuychik, palacionkunatapas qawamuychik, chaynapi qepa miraykunaman willanaykichikpaq.

¹⁴ Chaynam Diosninchikqa, wiña-wiñaypaq Diosninchikqa. Paymi wiña-wiñaypaq pusawaqninchikqa.