Salmos 47 - Chuya Qellqa 1992

Dioslla kay pachapa reynin kasqanmanta

Coreypa mirayninkunapa takisqanku

¹ ¡Llapa llaqtakuna, makikichikta hoqarispa taqllakuychik! ¡Kusikuywan qaparispa Diosman takiychik!

² Tayta Diosqa tukuy imapa hawanpi munaychakuqmi, payqa anchapas manchakuypaqmi payqa kay pachapi tukuy atiyniyuq Reymi.

³ Paymi nacionkunata munaychakunanchikpaq qoykuwanchik, llaqtakunatam chakinchikman churaykamun.

⁴ Paymi herencia allpata akllapuwarqanchik, chay allpaqa kuyasqan Jacobpa hatunchakunan allpam.

⁵ Tayta Diosmi, qapariywan kusikuypa chawpinpi, trompetapa waqayninpa chawpinpi, tiyanan trononman qespirqa.

⁶ ¡Tayta Diosta takikunawan yupaychaychik! ¡Reyninchikman takikunata takiychik!

⁷ Tayta Diosqa kay pachapi munaychakuq Reymi, ¡Payman yachaywan takiychik!

⁸ Tayta Diosmi llapallan nacionkunapi munaychakun; payqa chuya trononpim tiyachkan.

⁹ Nacionkunapa kamachiqninkunam Abrahampa Diosninpa llaqtanman hukllawakunku.

¹⁰ Tayta Diospam kay pachapi nacionkunaqa, payqa tukuy imapa hawanpi munaychakuqmi.