Salmos 45 - Chuya Qellqa 1992

Casamientomanta taki

Kuyanakuymanta Coreypa mirayninkunapa takin

¹ Sonqollaymi suma-sumaq rimaykunawan llimparichkan, qallullaypas allin qellqaqpa makin hinaraqmi reyman takipunaypaq chaylla kachkan.

² Llapan runamantapas kuyayllapaqmi qamqa kanki, suma-sumaq rimaqmi qamqa kanki, chayraykum wiñaypaq Dios bendecisunki.

³ ¡Qari-qari runa, espadaykita weqawnikiman watakuy! chayqa kancharichkaq adornoykim.

⁴ Atiynikipi hatunchakuy; cheqap kaqta nanachikunaykipaqmi lloqsinki, humildekunata nanachikunaykipaqmi lloqsinki, atiynikiwanmi manchakuypaq kaqkunata ruwanki.

⁵ Reynilláy, llaqtakuna ñawpaqnikipi wichichunku, enemigoykikunapa sonqonman ñawchi puntayuq flechaykikuna clavakuchun.

⁶ Diosnilláy, wiña-wiñaypaqmi munaychakuynikiqa, allin arregloman hinam munaychakunki.

⁷ Qamqa allin ruwaytam kuyanki, mana allin ruwaytañataqmi cheqninki, chayraykum qamta Dios akllasurqanki, Diosnikim qamtaqa akllasurqanki, kusikuywanmi miski asnaq aceitewan tallichkaq hina huntaykusurqanki.

⁸ Pachaykipas mirrawan, aloewan canelawanmi miskillataña asnarin; marfilwan adornasqa palaciokunapim arpa tocaqkunapas kusichisunki.

⁹ Reykunapa warmi churinkunapas akllasqayki warmikunapa chawpinpim kachkanku, Ofir llaqtamanta qori alhajakunawan adornasqa reinapas alleq lawnikipim sayachkan.

¹⁰ Kuyasqay churilláy, kay nisqayta uyariy: Llaqtaykitapas qonqayña, aylluykikunatapas qonqayña.

¹¹ Sumaq buenamoza kasqaykiraykum reyqa kuyasunki, qosayki kasqanraykuyá payta kasukuy.

¹² Tiro llaqtayuq sipaskunam regalokunata apamusunki, apu runakunam yanapakuynikita maskaspa hamusunki.

¹³ Reypa warmi churinmi palacioman suma-sumaqllaña yaykuchkan, qori qaytumanta awasqa pachayuqmi yaykuchkan.

¹⁴ Kuyayllapaq bordasqa pachayuqtam reyman pusachkanku, riqmasin sipaskunapas qepantam qatichkanku.

¹⁵ Ancha kusisqallañam hamuchkanku, kusisqallañam reypa palacionman yaykuchkanku.

¹⁶ Reynilláy, churikikunam ñawpaq taytaykikunapa rantinpi munaychakunqaku, paykunatam kay pachapi kamachikuqkunapaq churanki.

¹⁷ Sutikitapas runakunapa mana qonqanantam ruwasaq, chaymi llapallan llaqtakuna wiñaypaq yupaychasunki.