Salmos 43 - Chuya Qellqa 1992

Tayta Diosta mañakunamanta

¹ Diosnilláy, allin arreglotayá ruwaykullaway. Mana allinkuna ruwaq llulla runakunamanta libraykullaway.

² Diosnilláy, qamqa pakakunay wasim kanki, ¿Imanasqataq wischurullawanki? ¿Imanasqataq enemigoykunapa ñakarichisqan ancha llakisqa purisaq?

³ Achkikitawan cheqap kaqnikita apachimuway, chaykunayá pusawachun sapaqchakusqayki orqoman, qampa yachasqayki wasiman.

⁴ Diosnilláy, chaynapiqa altarnikipa kasqanmanmi chayamullasaq, chaypim arpata tocaspa yupaychasqayki. Diosnilláy, qamllam kawsayniyman kusikuyta huntaykunki.

⁵ ¿Imanasqataq hukmanyasqa kasaq? ¿Imanasqataq llakipa intusqan tarikusaq? Ñoqallayqa Diosnillaypim suyallasaq, paytam ñoqallayqa yupaychasaq, payqa salvaqniymi, payqa Diosniymi.