Salmos 41 - Chuya Qellqa 1992

Onqoq runapa mañakusqanmanta

Davidpa takin

¹ Mayna kusisqam wakcha runapi yuyaymanaq runaqa, paytaqa Tayta Diosmi sasachakuy tiempopipas libranqa.

² Tayta Diosmi chayna runataqa waqaychanqa, chayna runamanqa kawsaytam qonqa, kay pachapipas ancha kusisqam kanqa, enemigonkunamanpas manam qoykunqachu.

³ Onqosqaña kaptinpas Tayta Diosmi kallpanchanqa, onqoynintapas sanoyaymanmi tikraykunqa.

⁴ Tayta Diostam nirqani: “Llakipayariykullawaspa sanoyaykachillaway, contraykipim huchallikurullani”, nispay.

⁵ Enemigoykunam ñoqamanta rimaspa ninku: ¿Haykapitaq wañunqa? ¿Haykapitaq sutinpas chinkanqa? nispanku.

⁶ Watukuqniy hamuspankupas llullallatam rimanku, sonqonkupipas mana allinllatam waqaychanku, hawaman lloqsiruspañataqmi willakachakunku.

⁷ Cheqniwaqniykunam huñunakuruspa contraypi rimanku, contraypi mana allinllata tanteaspam ninku:

⁸ “Ima mana allincha kay runamanqa usturun, camanmantapas manañam hatarinqañachu”, nispanku.

⁹ Hapipakusqay amigoypas, kuska mikuqmasiypas contraypim hatarirun.

¹⁰ Ichaqa Dios Taytalláy, qamyá llakipayaykuwaspa hatariykachiway, imam ruwasqankuman hina pagapunaypaq.

¹¹ Enemigoykunapa mana vencewasqanwanmi qampaq hina kasqayta yachakusaq.

¹² Ñoqatañataqyá allin kawsakuyniyuq kasqayrayku waqaychaykuway, ñawpaqnikipiyá wiñaypaq takyachikuway.

¹³ Israelpa Diosninyá wiñaymanta wiñaykama yupaychasqa kachun. ¡Amén!