Salmos 38 - Chuya Qellqa 1992

Tayta Diospa yanapakuyninta mañakusqanmanta

Yuyarinapaq Davidpa takin

¹ Dios Taytalláy, piñakuynikipiqa amayá qaqchallawaychu, rabiakuynikipiqa amayá castigawaychu.

² Flechallaykikunam ñoqallayta usturuwan, makillaykim ñoqallayman wichiykuwan.

³ Piñakuynikiraykum cuerpollaypas sanoqa kanñachu, huchallaykunaraykum tullullaykunapas sanoqa kanñachu.

⁴ Mana allinkuna ruwasqaymi llasaq qepi hina ñitiwachkan.

⁵ Loco hina ruwasqayraykum heridallaypas ismuspa asnarichkan.

⁶ Chayraykum ñoqallayqa llakipa intusqan purichkani, tukuy punchawmi kurkunpallaña purichkani.

⁷ Wasallaypas llumpaytam rupachkan, cuerpollaypiqa manañam imaypas sanoqa kanñachu.

⁸ Cuerpollaypas ñutupasqam manaña kallpayuq kachkan, sonqollaypas hukmanyaspam ñakarichkan.

⁹ Señorlláy, ima munasqaytapas qanmi yachanki, llaki hapillawasqanpas manam qanmantaqa pakasqachu.

¹⁰ Sonqollaymi llakipa ñitisqan tarikun, kallpallaypas pasaypaqtañam tukurun, ñawillaypas pasaypaqtañam tutayarun.

¹¹ Amigoykunawan aylluykunapas onqosqayraykum karunchakuruwanku.

¹² Wañuchiway munaqkunam ñoqapaq toqllata churarunku, chinkachiwayta munaspankum rimanakurunku, mana samaykuspam wichichiwanankupaq contraypi tanteanakurunku.

¹³ Ñoqam ichaqa mana uyariqpas tukunichu, mana rimaq hinam mana rimarinichu;

¹⁴ mana uyarikuq hinañam rikuriruni, mana kutipakuy atiqñam rikuriruni.

¹⁵ Diosnilláy, qamllapim suyallani. Señorlláy, Diosnilláy, qamllam contestaykullawanki.

¹⁶ Mañakullaykim ñoqamanta ama asikuwanankupaq, mañakullaykim urmaruptiypas ama hatunchakunankupaq.

¹⁷ Ñoqallayqa wichiykunaypaq hinañam kallachkani, llakikuypa intusqanmi sapa punchaw kallachkani.

¹⁸ Huchallikusqaymantam ñakakuni, chaymi huchallaykunata willakullayki.

¹⁹ Enemigoykunam mirarun, yanqamanta cheqniwaqniykunam mirarun, paykunaqa kallpasapallañam kachkanku.

²⁰ Allin kaqta ruwaptiypas mana allinwanmi kutichiwanku, allin kaqta ruwaptiypas contraypim sayarinku.

²¹ Dios Taytalláy, ama sapallayta saqeruwaychu, ama ñoqamanta karunchakuychu.

²² Dios Taytalláy, salvaqniymi qamqa kanki, utqayman yanapaykullaway.