Salmos 32 - Chuya Qellqa 1992

Pampachasqa kaspa kusikuymanta

Diosman Davidpa takisqan

¹ ¡Mayna kusisqam huchanmanta pampachasqa runaqa! ¡Mayna kusisqam huchankunamanta chuyanchasqa runaqa!

² ¡Mayna kusisqam mana huchayuqpaqña Tayta Diospa hapisqan runaqa! ¡Mayna kusisqam tanteasqankunapi mana engañakuq runaqa!

³ Huchallayta mana willakuptiymi, tukuy punchaw waqasqaypi cuerpollaypas aswan-aswan eqoyarqa.

⁴ Tuta punchawmi piñakuyniki ñoqapi tarikurqa, rupaypi qawisqa wayta hinaraqmi kallpallaypas chinkarirqa.

⁵ Mana pakaykuspam huchallayta willakurqayki, mana kasukuyniykunata willakamuptiymi Diosnilláy pampachaykullawarqanki.

⁶ Chayraykum qanman iñiqkunaqa sasachakuyninku tiempopi mañakamusunki, maynaña lloqllapas paykunamanqa manam chayanqachu.

⁷ Qamllam pakaykuwaqniyqa kanki, ñakariymantam waqaychaykuwanki, librawaspaykim kusikuy takikunawan muyuriykuwanki.

⁸ Tayta Diosmi nin: Ñoqaqa qawachkaykim, yachachispaymi maymi purinaykita reqsichisqayki.

⁹ Amayá caballo hina otaq mula hina mana yuyayniyuqqa kaychu. Chay animalkunaqa jaquimawan riendaswan sujetanam, mana chayqa manam asukuykunchu.

¹⁰ Mana allin runakunaqa ancha ñakariypim tarikunqaku; Tayta Diosman hapipakuqkunamanmi ichaqa kuyakuyninwan muyuriykunqa.

¹¹ Allinkuna ruwaq runakuna, Tayta Diospi kusikuychik. Allin sonqoyuqkuna, kusikuymanta Tayta Diosman takiychik.