Salmos 31 - Chuya Qellqa 1992

Diosllapi David hapipakusqanmanta

Diosman Davidpa takisqan

¹ Dios Taytalláy, qamllapim hapipakullani, amayá saqerullawaychu, allin ruwaq kaynikiman hinayá libraykullaway.

² Uyariykullawaspayki utqayman libraykullaway, qaqa hinayá amparaykuway, pakakuna wasi hinayá pakaykullaway.

³ Qamqa waqaychaqniy qaqam kanki, pakaykuwaqniy wasim kanki; sutikiraykuyá waqaychawaspa pusallaway.

⁴ Enemigoykunapa trampanmantayá libraykullaway, qanmi waqaychaqniyqa kanki.

⁵ Dios Taytalláy, qamllamanmi espirituyta qomullayki, cheqap Diosnilláy libraykullaway.

⁶ Idolokunata yupaychaqkunataqa cheqninim, ñoqaqa Tayta Diosllapim hapipakullani.

⁷ Kuyakuynikim llumpayta kusichiwan, qanmi ñakarisqayta rikuwarqanki, qanmi sasachakuyniykunatapas yachanki.

⁸ Enemigoykunapa makinmanqa manam kachaykuwarqankichu, chakillaytapas allin allpapim churaykurqanki.

⁹ Dios Taytalláy, llakipayariykullaway, sasachakuypim tarikullani; ñawillaytawan cuerpollaytapas nanaymi intuykuchkan, tukuy ukullaytapas nanaymi tukuykuchkan.

¹⁰ Nanaypa intusqanmi vidallaypas tukuykuchkanña, llakipa pampasqanmi vidallaypas chinkaykuchkanña, huchallaymi kallpallayta tukuykuchkanña, tulluykunapas mana kallpayuqñam rikurirun.

¹¹ Enemigoykunapa despreciasqanmi rikurirullani, vecinoykunapa burlakusqanmi kallachkani, reqsiwaqniykunapa manchakusqanmi rikurirullani, callepi rikuwaqniykunapas ñoqamantam ayqekunku.

¹² Wañusqatapas hinañam ñoqataqa qonqarullawanku, pakisqa puyñu hinañam ñoqallayqa kallachkani.

¹³ Qepaypi rimakuwasqankutam uyarini, hatun manchakuymi muyurirullawan. Huk runa hinallam contraypi rimanakurunku, wañuchiwanankupaqmi tanteanakurunku.

¹⁴ Chaywanpas Diosnilláy, ñoqaqa qamllapi hapipakuspam nini: “Qamllam Diosniyqa kanki”, nispa.

¹⁵ Vidallayqa makillaykipim kachkan, qatikachawaqniy enemigoykunamanta libraykullaway.

¹⁶ Kay serviqllaykita kanchariykullaway, llakipayakuynikiman hina salvaykullaway.

¹⁷ Dios Taytalláy, qamllatam qayakamullayki, amayá penqaymanqa kachaykullawaychu. Mana allin runakunata penqayman churay, paykunata sepulturaman wischuykuspayki upallachiy.

¹⁸ Allin kawsakuqkunapa contranpi hatun tukuspa rimasqankumanta, allin kawsakuqkunata despreciaspa rimasqankumanta llulla rimaq siminkupas upallachun.

¹⁹ ¡Mayna hatunmi kuyakuynikiqa! Chaykunatam kasusuqnikikunapaq waqaycharqanki, chaykunatam qampi suyaqkunaman reqsichirqanki, lliw runapa ñawpaqninpim chayta ruwarqanki.

²⁰ Qanman hapipakuqkunataqa qayllaykipim pakaykunki, mana allin runakunapa tanteayninmantam libraykunki, enemigonkunapa kamikuyninmantam wasiki ukupi waqaychaykunki.

²¹ ¡Tayta Diosyá alabasqa kachun! sasachakuypi kaptiymi admirakuypaq kaqkunata ruwaykuspa kuyakuyninta reqsiykachiwarqa.

²² Manchakuyniypim nirqani: Tayta Diosmi qayllanmanta wischurullawan, nispay. Ichaqa qanmi qayakamullasqayta uyariykullawarqanki.

²³ Tayta Diosta kuyaychik llapa chuyanchasqankuna; haykam payman hapipakuqkunatam waqaychan, hatun tukuqkunamanmi ichaqa imaynam kawsasqanman hinam pagaykapun.

²⁴ Tayta Diosman hapipakuqkuna sonqoykichikta kallpanchaspa qarinchakuychik.