Salmos 3 - Chuya Qellqa 1992

Tayta Diospa yanapakuyninta David mañakusqanmanta

Churin Absalonpa qayllanmanta David lluptispan takisqanmanta

¹ Dios Taytalláy, enemigoykunam anchallataña mirarun, achkallañam contraypi hatarirunku.

² Achkallañam ñoqamanta kaynata ninku: “Paytaqa Diospas manam salvanqachu”, nispanku.

³ Dios Taytalláy, qanmi ichaqa muyuriykuwaspa pakaykuwanki, hatunchawaspam atiynikiwan kallpanchawanki.

⁴ Qapariywanmi Tayta Diosta mañakullani, payñataqmi sapaqchakusqan orqomanta uyariykamullawan.

⁵ Tayta Dios yanapawasqanraykum hawkalla siriykunipas, puñuykunipas, hatarinipas.

⁶ Wañuchiwananpaq achkallaña tropakuna muyuruwaptinpas manam manchakunichu.

⁷ Dios Taytalláy ¡hatariy! Diosnilláy ¡Salvaykullaway! Qanmi enemigoykunata uyanpi takanki, mana allin runakunapa kiruntam challunki.

⁸ Dios taytalláy, qamllam salvakuqqa kanki, Diosnilláy, llaqtaykitayá bendeciykuy.