Salmos 29 - Chuya Qellqa 1992

Tayta Diospa qapariyninmanta

Davidpa takisqan

¹ Hanaq pachapi kaqkuna, Tayta Diosta yupaychaychik, atiyniyuq kasqanmanta hatunchaspa yupaychaychik.

² Tayta Diospa ancha reqsisqa sutinta hatunchaychik, suma-sumaq wasinpi yupaychaychik.

³ Tayta Diosmi lamar qochapa hawanpi qaparin, sumaqllaña kancharichkaq Diosmi rayo hina qaparin, Tayta Diosmi hatun lamar qochapa hawanpi tarikun.

⁴ Tayta Diosmi hatunmanta qaparin, mayna atiyniyuqmi paypa qapariyninqa.

⁵ Tayta Diospa qapariyninwanmi cedro sachakunapas chitqarikunku, Líbano montepi cedrokunam kunpakamunku.

⁶ Líbano orqotawan Hermón orqotam uña torokunata hina pawaykachachin.

⁷ Tayta Dios qapariptinmi rawrachkaq nina lloqsimun.

⁸ Tayta Diospa qapariyninmi purun chunniqkunata katkatatachin, Tayta Diosmi Cades chunniqta katkatatachin.

⁹ Tayta Diospa qapariyninmi encina sachakunata pelaparun, montekunatam mana sachayuqta saqerun. Templonpiqa llapallankum hatunchanku.

¹⁰ Tayta Diosqa parakunapa hawanpim munaychakun, rey hinam payqa wiñaypaq munaychakun.

¹¹ Tayta Diosmi llaqtanman atiyta qon, Tayta Diosmi hawka kawsakuywan llaqtanta bendeciykun.