Salmos 28 - Chuya Qellqa 1992

Mañakuyta Dios uyarisqanmanta

Davidpa takisqan

¹ Waqaychaqniy Dios Taytalláy, qayakamusqayta chaylla uyariykullaway, mana uyariykullawaptikiqa wañusqakuna hinañam tarikurullasaq.

² Temploykiman makillayta hoqarispay mañakamullasqayta uyariykamullaway.

³ Amayá mana allin runakunatawan kuskataqa wischurullawaychu, amayá huchallikuqkunatawan kuskataqa aysarullawaychu; paykunaqa runamasinkuwanmi hawka kawsaymanta rimanku, ichaqa sonqonkupim tukuy mana allinkunata yuyaymananku.

⁴ Paykunamanqa imam ruwasqankuman hina pagaykapuy, mana allinkuna ruwasqankuman hina qoykapuy, makinkupa imam ruwasqankuman hina pagaykapuy, merecesqankuman hina qoykapuy.

⁵ Paykunaqa Tayta Diospa ruwasqankunatam mana entienderqakuchu, chayraykum paykunataqa tuñichispa manaña hatarichinqachu.

⁶ Dios Taytayá bendecisqa kachun, payqa mañakuyniytam uyariykullawan.

⁷ Tayta Diosmi atiyninwan harkaykuqniyqa, payllapi tukuy sonqoywan hapipakullaptiymi yanapaykullawan. Sonqollaymi kusisqa tarikun, takillaspaymi yupaychasaq.

⁸ Tayta Diosmi llaqtanpa kallpanchaqninqa, payllam akllakusqan reypa waqaychaqninpas, payllataqmi akllakusqan reypa salvaykuqninpas.

⁹ Dios Taytalláy, llaqtaykita salvaykuy, churikikunata bendeciykuy. Michispayki waqaychaykuy, marqaynikipi wiñaypaq takyachiy.