Salmos 26 - Chuya Qellqa 1992

Mana pantaspa kawsanamanta

Davidpa takisqan

¹ Dios Taytalláy, allin arreglota ruwaykullaway, allinllatam ñoqallayqa kawsakurqani; qamllapim tukuy sonqomanta hapipakurqani.

² Dios Taytalláy, allinta qatipaykuwaspa pruebaykullaway, sonqollaytawan imam tanteasqayta qawaykullaway.

³ Kuyapayakuynikipas ñawpaqllaypim kachkan, cheqap kaqnikipim purillachkani.

⁴ Iskay uya runakunawanqa manam hukllawakurqanichu, nitaqmi kuskanchakurqanichu.

⁵ Mana allin runakunapa huñunakuynintaqa cheqnirqanim, mana allin ruwaqkunawanqa manam kuskanchakurqanichu.

⁶ Dios Taytalláy, huchamanta makiyta mayllaykuspaymi altarnikiman hamullani,

⁷ qaparispa graciasta qospay qamllamanña takillanaypaq, admirakuypaq ruwasqaykimanta willakunaypaq.

⁸ Dios Taytalláy, yachanayki templollaykitam kuyallani, atiynikiwan huntasqa wasikitam kuyallani.

⁹ Amayá huchasapakunatawan kuskataqa chinkarachiwaychu, amayá runa wañuchiqkunatawanqa kuskancharuwaychu,

¹⁰ paykunapaqqa makinkupas mana allinpa huntasqanmi kachkan, sayniyuwan engañowan huntasqam kachkan.

¹¹ Ñoqam ichaqa mana huchallikuspay kawsachkani, llakipayaykuwaspa libraykullaway.

¹² Chakillayqa sunitam sayanqa manapunim mitkasaqchu, huñunakuqkunapa chawpinpipas Tayta Diostam yupaychasaq.