Salmos 24 - Chuya Qellqa 1992

Kancharichkaq reymanta

Diosman Davidpa takisqan

¹ Tayta Diospam kay pachaqa, chaynataq chaypi tukuy ima kaqkunapas, Tayta Diospam tukuy kay allpaqa, chaynataq chaypi yachaqkunapas.

² Paymi lamar qochapa hawanpi hatarichirqa, mayukunapa hawanpim allinta takyachirqa.

³ ¿Pitaq Tayta Diospa yachakunan orqoman qespinman? ¿Pitaq chuya wasinpi yachanman?

⁴ Mana imapipas huchallikuqmi, chuya sonqoyuqmi, idolokunata mana yupaychaqmi, yanqakunamanta mana juraqmi.

⁵ Chayna runatam Tayta Dios bendeciykunqa, salvakuq Diosmi mana huchayuqpaqña chaskiykunqa.

⁶ Tayta Diosta maskaqkunaqa chaynam kanqaku, Jacobpa Diosninta maskaqkunaqa chaynam kanqaku.

⁷ Wiñaypaq kaq punkukuna kicharikuychik, ñawpaq punkukuna kicharikuychik, Tukuy Atiyniyuq Reymi yaykunqa.

⁸ ¿Pitaq kay atiyniyuq Reyqa? Payqa allinnin qari-qari kallpasapa Tayta Diosmi, guerrapaq Tukuy Atiyniyuq Tayta Diosmi.

⁹ Wiñaypaq kaq punkukuna kicharikuychik, ñawpaq punkukuna kicharikuychik, Tukuy Atiyniyuq Reymi yaykunqa.

¹⁰ ¿Pitaq wak Tukuy Atiyniyuq Reyqa? Tukuy imapa hawanpi munaychakuq Tayta Diosmi, payqa Tukuy Atiyniyuq Reymi.