Salmos 21 - Chuya Qellqa 1992Diosman Davidpa takisqanmanta Davidpa takin 1 Dios Taytalláy, Atiynikipim reyqa llumpayta kusikun; salvaykuptikim reyqa llumpayta kusikun. 2 Sonqonpa munasqantam qoykunki, imam mañakusqantam qoykunki. 3 Qamqa taripaykuspaykim anchata bendeciykunki, umanmanpas qorimanta coronatam churaykunki. 4 Kawsakuy mañakususqaykitam qoykunki, wiñay kawsakuytam qoykunki. 5 Yanapaykuptikim hatunchasqa kachkan, reqsisqata hinaspa hatunchasqatam ruwaykunki. 6 Qamqa wiña-wiñaypaqmi payta bendeciykunki, qamqa paywan kaspaykim kusikuyta huntaykunki. 7 Tayta Diosman hapipakusqanraykum reyqa mana wichinqachu, tukuy imapa hawanpi munaychakuq Diospa kuyakuyninraykum mana kuyurichisqa kanqa. 8 Makikiwanmi enemigoykikunata hayparunki, alleqnikiwanmi cheqnisuqnikikunata hayparunki. 9 Dios Taytalláy rupachkaq ninawanmi chinkarachinki, juzganayki punchawpim hornota hina ruparachinki. 10 Kay pachamantawan runakunapa chawpinmantam mirayninkunata pasaypaqta chinkarachinki. 11 Mana allintaña ruwayta munasuspaykipas, contraykipiña tukuy imata tanteaspankupas manam atinqakuchu. 12 Paykunaman flechaykita qawaykachiptikim qayllaykimanta muyurispanku kallpaylla lluptinqaku. 13 Dios Taytalláy, atiynikiwan llumpayta hatunchakuy, atiyniyuq kasqaykimantam takillasaqku. |
Chuya Qellqa Revisión @ Sociedad Bíblica Peruana, 2012
Peruvian Bible Society