Salmos 20 - Chuya Qellqa 1992

Reypaq mañakusqanmanta

Davidpa takin

¹ Tayta Diosyá llakikuynikipi uyarisunki, Jacobpa Diosninyá imamantapas harkaykusunki.

² Sionpi santuarionmantayá yanapasuspayki kallpanchasunki.

³ Ofrendakuna qosqaykita yuyarispayá lliw kañana sacrificiokuna ofrecesqaykitapas chaskisunki.

⁴ Sonqoykipa munasqantayá qosunki, tanteasqaykikunayá ruwasqa kachun.

⁵ Salvasqa kasqaykiwanmi kusikusaqku, Diosnillanchikpa sutinpim banderata hoqarisaqku. Tayta Diosyá tukuy imapas mañakusqaykita qosunki.

⁶ Kunanmi yachaykuni Tayta Diosqa akllakusqan reyta vencechisqanta, payqa chuya hanaq pachamantam uyariykamunqa, enemigonkunamantam alleq makinwan salvaykunqa.

⁷ Paykunaqa guerrapaq carretankunapim hapipakunku, guerrapaq caballokunapim hapipakunku; ñoqanchikmi ichaqa Dios Taytallanchikpi hapipakusun.

⁸ Paykunaqa hukmanyaspam wichiykunku, ñoqanchikmi ichaqa sayarispa allinta takyasunchik.

⁹ Dios Taytallayku, reytayá yanapaykuy vencenanpaq, qayakusqayku punchawpiyá uyariykullawayku.