Salmos 2 - Chuya Qellqa 1992

Tayta Diospa churin munaychakunanmanta

¹ ¿Imanasqataq nacionkuna piñakuywan hatarinku? ¿Imanasqataq runakuna yanqakunata tanteanku?

² Kay pachapi reykunam hoqarikurunku, kamachikuqkunam Tayta Diospa contranpi hoqarikurunku, sapaqchakusqan reypa contranpi kaynata tanteanakurunku:

³ “Atiyninta tuñirachisun, munaychakuyninmanta librakusun”, nispanku.

⁴ Hanaq pachapi kawsakuqmi paykunamanta asikunqa, Tayta Diosmi paykunamanta burlakunqa.

⁵ Hinaspam piñakuyninwan paykunata qaqchanqa, rabiakuyninwanmi paykunata ninqa:

⁶ “Ñoqaqa akllakusqay reytam chuya Sión moqopi churani”, nispa.

⁷ Tayta Diospa yachachikuyninkunatam willakusaq, paymi niwarqa: “Churiymi qamqa kanki, kunanmi ñoqa churyarqayki;

⁸ mañakuwaptikiqa nacionkunatam herenciaykipaq qosqayki, tukuy kay pacham qampaqña kanqa.

⁹ Fierromanta tawnawan hinam paykunata pakinki, allpa mankata hinam paykunata ñutunki”, nispa.

¹⁰ Kay pachapi llapallan reykuna, uyarikuqyá kaychik. Kay pachapi kamachikuqkuna, qaqchasusqaykichiktayá uyariychik.

¹¹ Uchuychakuspayá Tayta Diosta serviychik, kusikuywanyá payta yupaychaychik.

¹² Diospa churintayá ama piñakunanpaq yupaychaychik, yanqañataq ñan risqaykichikpi wañuruwaqchik, payqa chaylla piñakuruqmi. ¡Mayna kusisqam paypi hapipakuq runakunaqa!