Salmos 19 - Chuya Qellqa 1992

Unanchasqanwan atiyninta Dios reqsichikusqanmanta

Davidpa takin

¹ Diospa atiyninmantam cielokuna willawanchik, makinwan ruwasqanmantam cielokuna qawachiwanchik.

² Punchawmi huk punchawman willan, tutapas huk tutamanmi yachachin.

³ Manaña ima rimariy uyarikuptinpas, manaña ima uyarikuptinpas,

⁴ paypa qayakuyllanmi kay pachaman kuchun-kuchun mastarikun, Diosmi cielopi intipa yachananta ruwaykurqa,

⁵ intiñataqmi noviopa cuartonmanta lloqsimuchkaq hinaraq lloqsimun, pawachkaq hinaraqmi kusisqallaña kallpamun.

⁶ Payqa cielokunapa cantonmantam lloqsiykamun, payqa cielokunapa patankamam purimun, rupayninmantaqa manam imapas pakakunchu.

⁷ Tayta Diospa kamachikuyninqa mana pantayniyuqmi, musoq kawsaytam qokun, Tayta Diospa kamachikuyninkunaqa cheqapmi, mana yachayniyuqmanmi yachayta qon.

⁸ Tayta Diospa kamachikuyninqa mana pantayniyuqmi, runakunapa sonqontam kusichin. Tayta Diospa kamachikuyninkunaqa chuyam, runakunapa ñawintam kanchaykun.

⁹ Tayta Diospa kamachikuyninqa chuyam, wiña-wiñaypaq takyaqmi. Tayta Diospa decretonkunaqa cheqapmi, mana chikallanpas pantayniyuqmi.

¹⁰ Qorimantapas aswan munaymi, chulluchispa chuyanchasqa qorimantapas aswan sumaqmi; panalninmanta suturimuq mielmantapas aswan miskiraqmi.

¹¹ Kamachikuynikiqa serviqllaykitapas anyaykullawanmi, haykam waqaychaqkunaqa premiasqam kallasaqku.

¹² ¿Pitaq imapipas pantarusqanta musyakun? Pakasqa huchaykunata pampachaykullaway.

¹³ Contraykipi hoqarikunaymanta waqaychaykullaway, ñoqapiqa hatun tukuyqa amayá munaychakuchunchu. Chaynapiqa pasaypaq mana huchayuqñam kawsakusaq, contraykipipas manañataqmi hoqarikusaqchu.

¹⁴ Dios Taytalláy, amparakunay qaqam kanki, libraykuqniymi kanki, rimasqaywan yuyaymanasqaypas qampaq hinayá kachun.