Salmos 18 - Chuya Qellqa 1992

Davidpa takisqanmanta

Saulmanta Dios libraykuptin Davidpa takisqan

¹ Dios Taytalláy, kallpanchaqniymi qamqa kanki, ¡ñoqaqa kuyaykim!

² Dios Taytalláy, waqaychaqniymi kanki, pakakunay wasim kanki, libraqniymi kanki. Kuyasqay Diosnilláy, amparakunaymi kanki, hapipakunaymi kanki, harkaqniy escudom kanki, atiywan salvaqniymi kanki, pakakunaymi kanki.

³ Ñoqallayqa Tayta Diostam qayakusaq, payllam yupaychana Diosqa, payllam enemigoymantapas salvaykuqniyqa.

⁴ Wañuymi waskankunawan chaqnarullawan tuñichikuqmi lloqlla hina mancharichiwan.

⁵ Wañuymi waskankunawan chaqnarullawan, wañuchikuq trampamanmi wichiykullani.

⁶ Sasachakuypi kaspaymi Tayta Diosta mañakullani, yanapaykuwananpaqmi Diosnillayta qayakullani, payñataqmi templonmanta uyariykamullawan, qayakullasqaytam uyariykamullawan.

⁷ Kay pacham katkatatarqa, orqokunapa sapinpas lliwmi kuyurirqa, paypa piñakuyninwanmi llumpayta mancharikurqa.

⁸ Paypa senqanmantam qosni lloqsimurqa, siminmantañataqmi rupachkaq nina lloqsimurqa, chaynata lloqsimuspam nina sansa ratarirurqa.

⁹ Cielota kicharispam uraykamurqa, tutay-tutay puyukunapa hawantam uraykamurqa.

¹⁰ Querubinpi sillakuykuspam pawarimurqa, wayrapa rapranpim payqa pawarimurqa.

¹¹ Tutayaypim pakakuykurqa, tutayaywanmi muyuriykachikurqa, yakunkama yanay-yanay puyuwanmi wankukuykurqa.

¹² Kancharichkaq qayllanmantam puyukuna hoqarikurqa, runtu parawan rupachkaq sansam chayamurqa.

¹³ Hanaq pachamanta qaparimuptinmi Tayta Diospa rimariynin rayo hinaraq uyarikurqa, qaparimuptinmi runtu parawan rupachkaq sansa wichirimurqa.

¹⁴ Flechanwanmi enemigonkunata cheqerachirqa, rayokunata kachaykuspam wañurachirqa.

¹⁵ Tayta Diospa qaqchakuyninwanmi lamar qochapa ukunkunapas rikuriramurqaraq, Tayta Diospa qapariyninwanmi kay pachapa cimientonkunapas rikukurqaraq,

¹⁶ Tayta Diosmi hanaq pachamanta hapiykamullawarqa, achka-achka yakupa chawpinmantam hurqoykullawarqa.

¹⁷ Atiyniyuq enemigoymantam libraykullawarqa, cheqniwaqniykunamantam libraykullawarqa; paykunaqa ñoqamanta aswan kallpayuqmi karqaku.

¹⁸ Sasachakuypi kachkaptiymi paykunaqa pawaykamuwarqaku, Tayta Diosllam ñoqataqa yanapaykullawarqa.

¹⁹ Sasachakuymantam hurqoykullawarqa, kuyawaspanmi libraykullawarqa.

²⁰ Tayta Diosqa allin kawsasqayman hinam premiaykullawan, munasqanta ruwasqayman hinam pagaykapullawan.

²¹ Diosniypa yachachikuynintam waqaycharqani, manam huchallikurqanichu, Diosmantaqa manam rakikurqanichu.

²² Kamachikuynikiqa ñawpaqniypim kachkan, yachachikuynikimantaqa manam karunchakurqanichu.

²³ Qayllaykipiqa chuyatam kawsakurqani, mana allinkunamantam karunchakurqani.

²⁴ Chuya kasqayman hinam, allin kawsasqayman hinam, Tayta Diosqa pagaykapullawan.

²⁵ Diosnilláy, kuyapayakuqkunawanqa kuyapayakuqmi kanki, qampi hapipakuqkunawanqa cumpliqmi kanki.

²⁶ Chuya runawanqa chuyam kanki, millay runawanqa sakrim kanki.

²⁷ Uchuychakuq runakunatam salvaykunki, hatun tukuqkunatañataqmi penqayman churanki.

²⁸ Diosnilláy qanmi achkiykuwaqniyqa kanki, tutayayniytam kanchaykuwanki.

²⁹ Qanwanqa nana-nanaq tropakunatam cheqechisaq, qanwanqa perqawan corralasqa llaqtakunatam tuñichisaq.

³⁰ Diospa ñanninqa mana pantayniyuqmi, Diospa promesankunaqa hapipakunapaqmi, paypi hapipakuqkunataqa waqaychanmi.

³¹ Diosnilláy, qamllam cheqap Diosqa kanki qam hina waqaychakuqqa manam hukqa kanchu.

³² Tayta Diosmi kallpanchaqniyqa, paymi allin ñanninta pusawaqniyqa.

³³ Luwichupata hinaraqmi chakiytapas kallpachin, orqonkunata kallpaspaypas manam urmasaqchu.

³⁴ Paymi guerrapi peleanaypaq yachachiwan, broncemanta arcowan flechanaypaqmi makiyta kallpanchan.

³⁵ Qanmi harkaykuwaspa salvaykuwanki, alleq makikiwanmi takyaykachiwanki, kuyakuynikiwan vencechiwaspam hatunchaykuwanki.

³⁶ Mana lluchkanaypaqmi ñanniytapas kichaykapuwanki.

³⁷ Enemigoykunatam qatispa hayparurqani, wañuchinaykamam mana kutimurqanichu.

³⁸ Pasaypaqtam puchukarachini manaña hatariy atinankamam ñutuparurqani, chaki pampaywanmi lliwta saruparurqani.

³⁹ Peleanaypaqmi kallpata qoykuwanki, enemigoykunatam ñawpaqniypi qonqorachinki.

⁴⁰ Enemigoykunatam qayllaymanta ayqechirqanki, chaynapim cheqniwaqniykunata tukururqani.

⁴¹ Qayakuptinkupas manam pipas yanaparqachu; Tayta Diosta qayakuptinkupas manam uyarirqachu.

⁴² Wayrapa apanan ñutu allpata hinam ñutururqani, ñanpi mituta hinam llinqaparurqani.

⁴³ Llaqtapa peleakuyninmantam libraykuwarqanki, nacionkunapa kamachiqnin kanaypaqmi churaykuwarqanki, mana reqsisqay llaqtakunawanmi serviykachiwarqanki.

⁴⁴ Mana reqsisqay runakunapa mirayninkunam hatunchawanku simiyta uyarispam chaylla kasuwanku.

⁴⁵ Mana reqsisqa runakunam hukmanyaruspanku pakakusqankumanta lloqsimunku.

⁴⁶ ¡Tayta Dios kawsachun! ¡Waqaychaqniy Dios qapaqchasqa kachun! ¡Salvaykuqniy Dios hatunchasqa kachun!

⁴⁷ Ñoqapa rantiypim enemigoykunamanta vengakurun, llaqtakunatam chaki pampayman churaykamun.

⁴⁸ Enemigoykunamantam libraykuwan, contraypi hatariqkunapa hawanpiraqmi churaykuwan, wañuchiqkunamantam libraykuwan.

⁴⁹ Chayraykum llapa nacionkunaman Tayta Diosmanta willakusaq, takikunawanmi sutikita hatunchasaq.

⁵⁰ Akllakusqayki reyta yanapaspam venceykachinki, Davidtawan mirayninkunatam wiñaypaq kuyapayaykunki.