Salmos 17 - Chuya Qellqa 1992

Justiciata David mañakusqanmanta

Davidpa mañakusqanmanta

¹ Dios Taytalláy, kay cheqap mañakuyllayta uyariykuway, qaparispa qayakullasqayta atiendeykuway, mana llullakuq simillaypa qayakuyninta uyariykullaway.

² Qamyá nanaykachikuway, munasqaykiman hina kawsaqtaqa qamllam reqsinki.

³ Qanmi sonqoytaqa sumaqta reqsirqanki, tutam watukaykamuwarqanki, pruebamanmi churaykuwarqanki, ichaqa ima mana allintapas manam tariwarqankichu. Tanteakurunim simiywanpas mana huchallikunaypaq.

⁴ Kamachikuynikita kasukuspaymi mana allin runakunapa ruwayninmanta waqaychakurqani, runa wañuchiqkunapa ñanninmantam suchurikurqani.

⁵ Ñannikipi sumaqta takyachiway, chaynapi chakiykuna mana lluchkananpaq.

⁶ Diosnilláy, uyariwaqniy kasqaykiraykum qamllata qayakamullayki, kumuykamuspayá rimapayasqayta uyariykullaway.

⁷ Hatu-hatun kuyakuynikita qawaykachillaway, pipas qampi hapipakuykuspa enemigonkunamanta ayqeqtaqa atiynikiwanmi salvaykunki.

⁸ Ñawi ruruykita hinayá waqaychaykuway, rapraykipa ukunpiyá pakaykuway.

⁹ Mana allinkuna ruwawaqniymantayá harkaykuway, muyuriqniypi enemigoykunamantayá waqaychaykuway.

¹⁰ Paykunaqa rumi sonqo runakunam, paykunaqa hatun tukuspa rimaqkunam;

¹¹ paykunaqa qatikachawaspam muyuriruwanku, pampaman wikapaykuwanankupaqmi qawawachkanku.

¹² Paykunaqa yarqasqa leonmanraqmi rikchakunkupas, uchkunpi pakakuchkaq leonmanraqmi rikchakunkupas.

¹³ Dios Taytalláy, ¡hatariy! Paykunapa contranpi sayariy, venceruspayki pampaman qonqorachiy, espadaykiwan mana allin runakunamanta libraykuway.

¹⁴ Dios Taytalláy, mana allin runamanta atiynikiwan libraykuway, kay vidapi ima allin kaqkunapas paykunapaqmi, wiksankupas kapuqnikikunawan huntasqam kachkan. Mirayninkutam saksachinku, willkankupaqpas puchunraqmi.

¹⁵ Ñoqam ichaqa uyaykita qawaykuspa kusikusaq, qanman rikchakuqña rikcharispaymi kusikusaq.