Salmos 15 - Chuya Qellqa 1992

Runamanta imatam Dios mañasqanmanta

Diosman Davidpa takisqan

¹ Dios Taytalláy, ¿pitaq chuya wasikipi yachanman? ¿pitaq sapaqchakusqayki orqopi yachanman?

² Mana huchapi purispa allinta kawsakuqmi, sonqomanta cheqapllata rimaqmi.

³ Runamasinta mana yanqamanta tumpaqmi, runamasinta mana imanaqmi, vecinonta mana insultaqmi.

⁴ Tayta Diospa cheqnisqan runata qepanchaqmi, Tayta Diosta kasukuqkunata hatunchaqmi, kikinpa mana allinninpaqña kachkaptinpas prometekusqanta ruwayman churaqmi.

⁵ Qollqentapas mana mirayniyuqpaq prestaqmi, mana huchayuqta sentenciananpaq sayniyuta mana chaskikuqmi. Chayna kawsakuq runaqa manam haykapipas wichinqachu.