Salmos 149 - Chuya Qellqa 1992

Reyninchik Diosta yupaychanamanta

¡Aleluya!

¹ ¡Aleluya! Tayta Diosman musoq takita takipuychik, chuyanchasqankuna huñunakuspa yupaychaychik.

² Israelpa mirayninkuna unanchaqnikichikpi kusikuychik, Sión llaqtapi yachaqkuna Reynikichikpi kusikuychik.

³ Paytayá danzawan yupaychaychik, panderetawan arpawan takipuychik.

⁴ Tayta Diosmi llaqtanwan kusikun; uchuychakuqkunatam vencechispa hatunchan.

⁵ Tayta Diospa chuya llaqtan, vencesqaykichikmanta kusikuychik camaykichikpipas kusikuymanta takiychik.

⁶ Diosta simikichikwan hatunchaychik, makikichikwanñataq iskay filoyuq espadata hapiychik,

⁷ chaynapi nacionkunata vengakunaykichikpaq, llaqtakunata castiganaykichikpaq;

⁸ reyninkuta cadenawan watuchanaykichikpaq, kamachiqninkunata fierro cadenawan chaqnanaykichikpaq;

⁹ paykunapa contrankupi, Diospa castigonta ruwayman churanaykichikpaq. Chaymi chuyanchasqankunapa kusikuynin kanqa. ¡Aleluya!