Salmos 146 - Chuya Qellqa 1992

Hapipakuqninkunata Dios bendecisqanmanta

¡Aleluya!

¹ ¡Aleluya! Tukuy sonqoywanmi Tayta Diosta yupaychasaq.

² Kawsanaykamaqa Tayta Diostam yupaychasaq, kawsanaykamaqa Diosniypaqmi takipusaq.

³ Ancha reqsisqa runakunapiqa ama hapipakuychu, paykunaqa runallam manam pitapas salvanchu,

⁴ wañuruspa allpayaruqllam, ima ruway munasqanpas chay punchawllapim tukurun.

⁵ ¡Mayna kusisqam Jacobpa Diosninmanta yanapakuy chaskiq runaqa! ¡Mayna kusisqam Tayta Diospi suyaq runaqa!

⁶ Payqa hanaq pachata, kay pachata, lamar qochata, chaypi kaqkunatapas unanchaqmi; paypa rimasqanqa wiñaypaq mana pantayniyuqmi.

⁷ Tayta Diosqa, ñakarichisqakunata nanachikuqmi, yarqasqakunata mikuchiqmi, presochasqakunata kachariqmi.

⁸ Tayta Diosqa, ñawsakunapa ñawin kichariqmi, Tayta Diosqa, tuñisqakunata hatarichiqmi, Tayta Diosqa, allin ruwaqkunata kuyaqmi.

⁹ Tayta Diosqa, huklaw llaqtayuqkunata nanachikuqmi, wakchakunatawan viudakunata uywaqmi, mana allin runapa tanteasqantam ichaqa pantachin.

¹⁰ Tayta Diosqa Sión llaqtapim munaychakunqa, wiña-wiñaypaqmi kamachikunqa. ¡Aleluya!