Salmos 144 - Chuya Qellqa 1992

Diosqa waqaychakuq kasqanmanta

Davidpa takin

¹ Tayta Diosyá qapaqchasqa kachun, payqa pakaykuqniy qaqam, paymi makiykunata peleananpaq yachachin, paymi guerrapi peleanaypaq yachachiwan

² Diosqa ancha kuyawaqniymi, amparaykuwaspa pakaykuqniymi, libraykuwaspa harkakuqniymi, payllapim ñoqallayqa hapipakuni; llaqtakunatam munaychakunaypaq makiyman churaykun.

³ Dios Taytalláy, ¿pitaq runaqa paymanta yuyarinaykipaqqa? ¿Pitaq runaqa kuyapayarinaykipaqqa?

⁴ Runaqa waspiruq samay hinallam, kawsakuyninpas llantuy hina chinkaruqllam.

⁵ Dios Taytalláy, hanaq pachata kicharispa uraykamuy, orqokunata llapchaykuptiki qosnirichunku.

⁶ Llipyakunata kacharispayá enemigoykikunata cheqerachiy, flechaykikunata kacharispayá chaqwarachiy.

⁷ Hanaq pachamanta makikita haywarimuy, kay hatu-hatun ñakariymanta libraykullaway, mana reqsisqa runakunamanta waqaychaykullaway.

⁸ Paykunaqa llullatam rimanku, llullakuspa juranankupaqmi alleq makinkutapas hoqarinku.

⁹ Diosnilláy, musoq takitam qampaq takipusqayki, arpakunawanmi qampaq takipusqayki.

¹⁰ Qamllam reykunatapas vencenankupaq yanapanki, serviqniki Davidtapas espadapa puntanmanta libraqmi kanki.

¹¹ Mana reqsisqa runakunamanta libraykullaway, siminkupas paykunapaqqa llullallatam rimanku, llullakuspa juranankupaqmi makinkutapas hoqarinku.

¹² Qari churiykupas waytarichkaq sachakuna hinayá kachunku; warmi churiykupas palaciopa esquinankuna takyachiq labrasqa pilarkuna hinayá kachunku.

¹³ Taqeykupas tukuy rikchaq kawsaykunawan huntasqa kachun, animalniykupas allpaykupiyá wara-waranqanpi mirachun.

¹⁴ Toroykupas llamkananpaqyá kallpasapa kachun, llaqtaykupa perqankunapipas amayá raqrakunaqa kachunchu, llaqtaykupa callenkunapipas amayá llakikuymanta qapariqkunaqa uyarikuchunchu.

¹⁵ ¡Mayna kusisqam tukuy chaykunata hatalliq llaqtaqa! ¡Mayna kusisqam Tayta Diosta, Diosninpaq hapiq llaqtaqa!