Salmos 142 - Chuya Qellqa 1992

Sasachakuypi kaspan mañakusqanmanta

Davidpa mañakuynin

¹ Qaparispaymi Tayta Diosta mañakullani, qaparispaymi llakipayakuyninta mañakullani.

² Qayllanpim quejakullani, payllamanmi llakiyta willakullani.

³ Llakipa intusqanña tarikuptiypas qamllam ñanniyta reqsinki. Wichinaypaqmi purinay ñanpi trampata churarunku.

⁴ Alleqniyta qawariy, manam pipas yanapaykuwaqniy kanchu, manam maymanpas ayqeyta atinichu, manam pipas kawsakuyniy nanachikuq kanchu.

⁵ Dios Taytalláy, qayakamullaspaymi niki: Qamllam pakaykuqniyqa kanki, qamllam kay pachapiqa tukuy ima kapuwaqniypas kanki, nispay.

⁶ Ancha llakisqam tarikuni qayakuyniyta uyariykullaway. Qatikachaqniykunamanta libraykullaway, paykunaqa ñoqamantapas aswan kallpasapallañam.

⁷ Carcelmantayá almallayta hurqoykuy, sutillaykita yupaychanaypaq. Yanapaykuwaptikiqa allin ruwaq runakunam muyuykuwanqa.