Salmos 141 - Chuya Qellqa 1992

Waqaychasqa kananpaq mañakusqanmanta

Diosman Davidpa takisqan

¹ Qamtam Dios Taytalláy, qayakamullayki, utqayman yanapaykullaway, qayakuyniyta uyariykullaway.

² Mañakuyniypas kañasqa incienso hinayá qayllaykiman chayamusunki, makillaykuna hoqarisqaypas tardeykuq ofrenda hinayá chayamusunki.

³ Dios Taytalláy, simillaytayá wichqaykuy, mana allinkuna rimanaymanta simillayta waqaychaykuy.

⁴ Mana allin piensaykunamanta sonqollayta sapaqchaykuy, mana allin ruwaykunapi purinaymanta harkaykuway, mana allin ruwaqkunapa asipayawananpaqqa amayá saqeykuwaychu.

⁵ Allin kawsakuq runapa corregiwayninqa allinniypaqmi kanqa, chayna runapa qaqchaykuwayninqa, miski asnaq perfume hinaraqmi. Diosnilláy, mana allin ruwayninkupa contranpim mañakullayki.

⁶ Mana allin runakunapa kamachiqninkunaqa qaqaman wischusqam kanqaku, chaynapim rimasqaypa cheqap kasqanta yachanqaku.

⁷ Hinaptinmi llapa runakuna ninqaku: Tullunkupas yapusqa allpapi hinam sepulturapa patanpi chuqa-chuqa qeparun, nispanku.

⁸ Dios Taytalláy, chayraykum ñawillaytapas qamllapi churallani. Qamllapim hapipakullani, amayá saqerullawaychu.

⁹ Mana allin runakunapa trampanmantawan toqlla churasqanmanta waqaychaykullaway.

¹⁰ Mana allin runakunaqa kikillankupa toqlla churasqankumanyá wichichunku, ñoqallaytayá ichaqa hawkallata pusakullaway.