Salmos 138 - Chuya Qellqa 1992

Diospa yanapakuyninmanta

Davidpa takisqan

¹ Tukuy sonqoywanmi yupaychasqayki, angelkunapa qayllanpim sumaq takikunata takipusqayki.

² Chuya wasiki lawman qonqoraspaymi kuyakuynikimanta, cheqap kaynikimanta sutikita yupaychasaq. Qamqa sutikitawan palabraykitam tukuy imapa hawanman churarunki.

³ Qayakamusqay punchawmi uyariykuwarqanki, almallaytam kallpanchaykurqanki.

⁴ Dios Taytalláy, chuya simikipa nisqanta uyarispankum kay pachapi llapallan munaychakuqkuna qamta yupaychasunki.

⁵ Tukuy ima ruwasqaykimantam paykuna yupaychasunki: Tayta Diospa kanchariyninqa ancha hatunmi,

⁶ Tayta Diosqa hatu-hatunmi, uchuychakuqkunatam yanapan, hatun tukuqkunatam ichaqa karullamantaraq reqsiykun, nispanku.

⁷ Sasachakuypi kaptiypas qanmi kallpanchaykuwanki, enemigoykunapa piñakuyninmantam atiynikiwan salvaykuwanki.

⁸ Tayta Diosmi ñoqapi tukuy ima munasqanta ruwanqa. Dios Taytalláy llakipayakuynikiqa wiña-wiñaypaqmi, amayá ruwasqaykikunataqa saqeruychu.