Salmos 137 - Chuya Qellqa 1992

Babiloniapi preso kaspa waqasqankumanta

¹ Babiloniapa mayunkunapa patanpi tiyaykuspam Sión llaqtata yuyarispa waqarqaniku.

² Chay llaqtapim sauce sachakunapi arpaykutapas warkurqaniku.

³ Preso apaqniykum, tukuy imayku qechuqniykum, kusikuywan takinaykuta mañakuspa niwarqaku: ¡Sión llaqtapa takinkunata takiykapuwayku! nispanku.

⁴ ¿Imaynataq Tayta Diospa takinta takiymanku mana reqsisqayku llaqtapiqa?

⁵ Jerusalén llaqtalláy, qamta qonqaruptiyqa alleq makiyá chakiruchun.

⁶ Jerusalén llaqtalláy, qamta mana yuyaptiyqa, qamta mana hatunchaptiyqa, kusikuyniypa hawanman qamta mana churaptiyqa, paladarniyman qalluy laqakuruchun.

⁷ Dios Taytalláy, Edompa mirayninkunata yuyariy, paykunam Jerusalén vencesqa kaptin nirqaku: ¡Taqmaychik! ¡Pampankama tuñichiychik! nispanku.

⁸ Babilonia llaqta, imam ruwawasqaykikumantam qampas tuñichisqa kanki. ¡Ancha kusisqayá kachun ruwasqaykikunaman hina pagapusuqnikiqa!

⁹ ¡Ancha kusisqayá kachun uña warmaykikunata hapiykuspa rumikunaman waqtapaqkunaqa!