Salmos 130 - Chuya Qellqa 1992

Israelta Tayta Dios salvananmanta

Diosman asuykunapaq taki

¹ Dios Taytalláy, uku-ukumantam qayakamullayki.

² Diosnilláy, qayakuyniyta uyariykullaway; mañakuyniyta chaskiykullaway.

³ Dios Taytalláy, huchaykuta hinalla yuyaptikiqa, ¿piraq qayllaykipi takyanman?

⁴ Ichaqa qamllapim pampachakuyta tariniku, chaynapi qamllata hatunchanaykupaq.

⁵ Tukuy almaywanmi Tayta Diospi suyallani, tukuy sonqoywanmi palabraykipi hapipakullani.

⁶ Llaqta waqaychaqkuna achikyananta suyachkaq hinam, almallayqa Tayta Diosta suyan. Imaynam llaqta waqaychaqkuna achikyananta suyasqanta hinayá,

⁷ qampas Israel llaqta, Tayta Diosllapi suyay; Tayta Diosqa ancha kuyakuqmi payqa salvaqninchikmi.

⁸ Paymi Israelta tukuy huchanmanta pampachanqa.