Salmos 126 - Chuya Qellqa 1992

Diospa llaqtan kusikunanmanta

Diosman asuykunapaq taki

¹ Sión llaqtayuqkunata preso risqankumanta Tayta Dios kutirachimuptinmi, mosqoypi hinaraq tarikurqanchik.

² Hinaptinmi miskillataña asispanchik qaparispa takirqanchik. Huklaw nacionniyuq runakunapas nirqakum: “Tayta Diosmi paykunawan hatun kaqkunata ruwarun”, nispanku.

³ Arí, Tayta Diosqa hatun kaqkunatam ñoqanchikwan ruwarqa, ¡chaynapim llumpayta kusikurqanchik!

⁴ Dios Taytalláy, musoqmantayá hawkayayta qoykuwayku, imaynam Neguev wayqopi kallpaq yakukunata hinaraq.

⁵ Weqenkuwan tarpuqkunaqa kusikuywanmi cosechanqaku.

⁶ Allin muhuta apaqkunaqa waqastinmi rinqaku, ichaqa ancha kusisqam gavillakuna marqarisqa kutimunqaku.