Salmos 124 - Chuya Qellqa 1992

Israelpa salvaqninqa Dioslla kasqanmanta

Davidpa takisqan

¹ Sichum Tayta Dios mana ñoqanchikpa rantinchikpichu kanman karqa, hinaptinqa Israel miraykuna kaynata nichunku:

² Sichum runakuna contranchikpi hatariptinku Tayta Dios mana ñoqanchikpa rantinchikpichu kanman karqa, hinaptinqa

³ sinchi piñakuyninkupichá kawsachkaqllata millpuruwachwan karqa.

⁴ Yakukunachá pamparuwachwan karqa, mayuchá aparuwachwan karqa.

⁵ Kallpasapa lloqllachá pamparuwachwan karqa, nispanku.

⁶ Tayta Diosyá hatunchasqa kachun, kirunkuwan kachupaspa mana mikuruwananchikpaq harkaykuwasqanchikmanta.

⁷ Tranpawan hapiqkunamanta lluptiruq urpicha hinam almanchik lluptirun. Toqlla tipiruptin lluptichkaq hinam lluptirunchik.

⁸ Hanaq pacha kay pacha unanchaq Tayta Diosmi lluptinanchikpaq yanapaykuwanchik.