Salmos 122 - Chuya Qellqa 1992

Jerusalén hawka kananpaq mañakunamanta

Davidpa takin

¹ Ñoqam anchata kusikurqani: Tayta Diospa templonman hakuchik, niwaptinku.

² Jerusalén llaqta, punkuykipiñam kachkaniku.

³ Jerusalén llaqta, Israel miraykunapa huñunakunanpaq ruwasqa llaqta.

⁴ Chaymanmi Israelpa mirayninkuna rinku, kamachisqanman hina Tayta Diosta yupaychamunankupaq.

⁵ Chaypim kachkan queja allichaq juezkuna, chaymantam Davidpa mirayninkuna kamachikunku.

⁶ Jerusalén llaqta hawka kananpaq mañakuychik: Jerusalén llaqta, qampiyá hawkayay kachun, kuyasuqnikikunayá hawka kawsakuchunku.

⁷ Perqaykikunapa ukunpi hawkayay kachun, palacioykikunapipas hawkayay kachun, nispa.

⁸ Kunanqa aylluykunaraykum, amistadniykunaraykum nisaq: “Hawkayay qampi kachun,

⁹ Tayta Diosninchikpa wasinraykum allinnikita maskasaq”, nispay.