Salmos 121 - Chuya Qellqa 1992

Tayta Diosqa waqaychakuq kasqanmanta

Diosman asuykunapaq taki

¹ Orqokunata qawarispaymi tapukullani: ¿Maymantaraq yanapaqniy hamullawanqa? nispay

² Tayta Diosmi yanapaqniyqa, payqa kay pacha hanaq pacha unanchaqmi.

³ Manam haykapipas urmanaykita munanqachu, waqaychasuqnikiqa manam haykapipas puñunqachu.

⁴ Israel castapa waqaychaqninqa manam puñunchu, manataqmi puñuywanpas aysachikunchu.

⁵ Tayta Diosmi waqaychasuqnikiqa, Tayta Diosmi yanapasuqnikiqa, Tayta Diosmi waqtaykipi kachkan yanapasunaykipaq.

⁶ Punchawpi intipa rupayninpas manam imanasunkichu, tutanpi killapas manam imanasunkichu.

⁷ Tayta Diosmi ima mana allinmantapas waqaychasunki, paymi kawsakuynikitapas waqaychanqa.

⁸ Mayta riptikipas kutiykamuptikipas Tayta Diosmi wiñaypaq waqaychasuqnikiqa.