Salmos 12 - Chuya Qellqa 1992

Diospa yanapakuyninta Davidpa mañakusqanmanta

Pusaq cuerdayuq instrumentokunawan takina

¹ Dios Taytalláy, ¡salvaykullawayku! Sonqomanta iñisuqnikikunaqa chinkarunkuñam, cheqap rimaq runakunaqa manañam kankunañachu.

² Llapa runaqa llullallatam rimanku, alabakuspam engañanakunku, iskay uyañam rikurirunku.

³ Dios Taytalláy, iskay uyakunataqa qanmi puchukachinki, yanqakunata rimaspa hatunchakuqkunataqa qanmi chinkarachinki.

⁴ Paykunaqa kaynataraqmi ninku: “Siminchikwanmi vencekusun, rimasqanchikwanmi valechikusun. ¿Pitaq ñoqanchikta kamachiwachwan?” nispanku.

⁵ Tayta Diosmi kaynata nin: “Ñakariqkuna sarupasqa kasqanraykum, wakchakuna ñakarichisqa kasqanraykum, kunanpuni hatarisaq. Paykunamanqa imam yanapakuy mañakusqankutam qosaq”, nispa.

⁶ Tayta Diospa rimarisqankunaqa cheqapmi, hornopi qanchis kutikama chulluchisqa chuyay-chuyay qollqe hinam.

⁷ Dios Taytalláy, waqaychaykullawayku, mana allin runamanta wiñaypaq harkaykullawayku.

⁸ Mana allin runakunam tukuy hinastinpi muyurichkanku, llapa runakunapas mana allintaraqmi hatunchanku.