Salmos 114 - Chuya Qellqa 1992

Egiptomanta lloqsimusqanku yuyarinapaq taki

¹ Israelpa mirayninkuna Egiptomanta lloqsiramuptinkum, Jacobpa mirayninkuna huklaw llaqtamanta lloqsimuptinkum,

² Judá nacionpas Diospa santuarionñam rikurirurqa, Israelpas munaychakunan nacionñam rikurirurqa.

³ Lamar qochapas paykunata rikuykuspanmi ayqekurqa, Jordán mayupas qepamanmi kutirikurqa.

⁴ Orqokunapas carnerokuna hinam pawaykacharqaku, moqokunapas chitakuna hinam pawaykacharqaku.

⁵ Lamar qocha ¿imanasqataq ayqerqanki? Jordán mayu ¿imanasqataq qepaman kutirirqanki?

⁶ Orqokuna ¿imanasqataq carnerokuna hina pawaykacharqankichik? Moqokuna ¿imanasqataq chitakuna hina pawaykacharqankichik?

⁷ ¡Allpa pacha! Tayta Diospa qayllanpi katkatatay, Jacobpa yupaychasqan Tayta Diospa qayllanpi katkatatay.

⁸ Paymi qaqata yakupa kanan qochamanña tikrarurqa, qaqa rumitam pukyumanña tikrarurqa.