Salmos 111 - Chuya Qellqa 1992

Tayta Diospa ruwasqankunamanta

¡Aleluya!

¹ Tayta Diosmanmi tukuy sonqoywan takisaq, chuya runakunapa huñunakuyninpim yupaychasaq.

² Tayta Diospa ruwasqankunaqa admirakuypaqmi, pipas chaykunata kuyaqqa kusikunmi.

³ Ruwasqankunaqa suma-sumaqmi, allin arreglokuna ruwasqanpas wiñaypaqmi.

⁴ Tayta Diosqa llakipayarikuspa kuyapayakuqmi, admirakuypaq ruwasqankunaqa mana qonqanapaqmi.

⁵ Kasukuqninkunataqa mikusqatam uywan, pacto ruwasqantapas manam qonqanchu.

⁶ Atiyninwan ruwasqankunatam llaqtanman qawachirqa, huklaw nacionkunapa allpantam paykunaman qoykurqa.

⁷ Paypa ruwasqankunaqa mana pantayniyuqmi, kamachikuyninkunapas mana pantayniyuqmi,

⁸ kamachikuyninkunaqa wiña-wiñaypaq takyaqmi, cheqap hinaspa mana pantayniyuqmi.

⁹ Payqa llaqtantam librarqa, pactotam wiña-wiñaypaq ruwarqa, payqa chuya Diosmi, payqa manchakuna Diosmi.

¹⁰ Yachaypa qallariyninqa Tayta Diosta kasukuymi; kamachikuyninta kasukuqkunaqa allin yachayniyuq runakunam. ¡Diosqa wiñaypaq hatunchasqam kanqa!