Salmos 11 - Chuya Qellqa 1992

Diosllaman hapipakunamanta

Manchakuypi tarikuspan Davidpa takisqanmanta

¹ Tayta Diospim hapipakuni. ¿Imanasqataq niwankichik: “Orqokunaman ayqekuy urpikuna hina” nispaykichik?

² Mana allin runakunata qawariychik: Flechankutam alistachkanku, pakapallamantam allin sonqoyuq runakunata flechanku.

³ Maypacham cimientokuna tuñiykuptinqa ¿imatañataq allin sonqoyuq runaqa ruwanman?

⁴ Tayta Diosqa chuya templonpim kachkan, hanaq pachapitaqmi tiyananpas kachkan, chaymantam llapa runata allinta qawamuchkan.

⁵ Tayta Diosqa, allin ruwaqtapas mana allin ruwaqtapas qawachkanmi; payqa mana allin runataqa cheqninmi.

⁶ Paykunapa hawanmanmi rupachkaq sansata azufreyuqta paraykachimunqa, rupachkaq wayrawanmi kañarunqa, chaynam paykunapa pagon kanqa.

⁷ Tayta Diosqa allin arreglo ruwaqmi, chaynapim allin ruwaytaqa kuyan, allin kawsaqkunaqa Tayta Diospa uyantam qawanqaku.