Salmos 109 - Chuya Qellqa 1992

Vengakunanpaq Diosta qayakusqanmanta

Davidpa takisqan

¹ Yupaychasqay Diosnilláy, ama upallakuychu.

² Mana allin runakunam, llulla runakunam contraypi rimanku. Llullallatam contraypi rimanku.

³ Cheqnikuy rimaywanmi muyuriruwanku, mana imamantam maqawanku.

⁴ Kuyachkaptiypas paykunaqa cheqnikuwankum, ñoqam ichaqa mañakullachkayki.

⁵ Paykunapaq allinta ruwachkaptiypas mana allinwanmi kutichiwanku, paykunata kuyachkaptiypas cheqnikuwankum.

⁶ Mana allin runayá chayna runataqa juzgachun, acusaqninyá waqtanpi sayachun.

⁷ Juzgasqa kaspapas huchayuqyá kachun; mañakuyninyá huchayuqta ruwachun.

⁸ Amayá unaytachu kawsachunpas, llamkayninmanpas hukña yaykuchun.

⁹ Churinkunapas mana taytayuqña qepachun, warminpas mana qosayuqña qepachun.

¹⁰ Churinkunapas limosnakustin purichunku, purmachisqa wasinkumantapas wischusqa kachunku.

¹¹ Llapa ima kapuqnintapas manuqnin runa apakuchun, llamkapakuspa ganakusqantapas mana reqsisqa runakuna qechuruchun.

¹² Paytawan churinkunataqa ama pipas llakipayachunchu.

¹³ Mirayninpas chinkachisqa kachun, sutinpas wiñaypaq chinkachisqa kachun.

¹⁴ Dios Taytalláy, taytanpa mana allin ruwasqantapas ama qonqaruychu, mamanpa huchallikusqantapas ama pampachaychu.

¹⁵ Paykunapa huchanqa hinallayá Diospa qayllanpi kachun, kay pachapiqa ama pipas paykunataqa yuyarichunchu.

¹⁶ Payqa mana kuyapayakuqmi karqa, wakchatawan mana imayuqtam ñakarichirqa; ñakarichisqakunatam wañuchinankama qatikacharqa.

¹⁷ Ñakayllata munasqanraykuyá ñakasqa kachun, bendecisqa kaytapas manam munarqachu chaynaqa ama pipas bendecichunchu.

¹⁸ Ñakaywanmi pachawan hina pachakururqa, chaymi yaku hinaraq ukunmanpas yaykururqa, aceite hinaraqmi tullunkunamanpas yaykururqa.

¹⁹ Pacha hinaraqmi pampaykurqa, watakunan chumpi hinayá ñakarichichun.

²⁰ Dios Taytalláy, enemigoykunamanwan contraypi rimaqkunaman chaynata pagapuy.

²¹ Señorlláy, Dios Taytalláy, pim kasqaykiraykuyá allinta ruwaykullaway, kuyapayakuq kasqaykiraykuyá libraykullaway.

²² Ñoqaqa ñakariypi sasachakuypim kallachkani, sonqollaypas sinchi nanasqam kachkan.

²³ Llantuy hinam chinkaykullachkaniña, wayrapa apasqan aqaruway hinañam kallachkani.

²⁴ Mana mikusqayraykum moqoykunapas katkatatachkan, mana mikusqayraykum tullunwan qarallanña kachkani.

²⁵ Paykunapa asipayananñam kallachkani, qawariwaspankum umankutapas aywisparaq burlakuwanku.

²⁶ Señornilláy, Dios Taytalláy, yanapaykullaway, kuyakuynikiman hina salvaykullaway.

²⁷ Dios Taytalláy, kaykunaqa makikipa ruwasqan kasqanta yachachunku, kaykunataqa qanmi ruwarqanki.

²⁸ Hinayá ñakawachunkupas, qanmi ichaq bendeciwanki. Paykunañataqmi penqaypi kanqaku, ñoqa serviqnikiñataqmi kusikusaq.

²⁹ Enemigoykuna sinchi penqaypi kachunku, penqakuyyá capa hina paykunata wankuruchun.

³⁰ Ñoqaqa Tayta Diosmanmi graciasta qosaq, achka runapa qayllanpim hatunchasaq.

³¹ Payqa wakcha runatam nanachikun, wañunanpaq sentenciaqninmantam salvaykun.